28.október 2014. Listaverk Ólafs Elíassonar og Minik Rosing sem myndað er úr eitt hundrað tonnum af ís frá Grænlandi er nú til sýnis á Ráðhústorginu í Kaupmannahöfn.
Markmiðið er að vekja athygli á næstu skýrslu Loftslagsnefndar Sameinuðu þjóðanna sem gefin verður út í lok vikunnar. Dansk-íslenski listamaðurinn Ólafur og Minik Rosing, jarðfræðiprófessor sem fæddur er á Grænlandi, standa að baki sýningunni sem opnuð var á sunnudag og lýkur miðvikudag 29. október.
Ísblokkunum er raðað upp á torgið eins og vísum á úri til að tákna vekjaraklukku. Verkinu er ætlað að vekja athygli á fimmtu matsskýrslu Loftslagsnefndar Sameinuðu þjóðanna IPCC Intergovernmental Panel on Climate Change) sem gefin verður út í vikulok eftir vikulangan fund nefndarinnar í Kaupmannhöfn. „Við, íbúar heimsins, verðum og getum brugðist við núna,“ segja Ólafur og Rosing. „Við getum breytt þekkingu á loftslaginu, í aðgerðir í þágu loftslagsins.“
En hvern vegna er þekktur listamaður á borð við Ólaf Elíasson að beita sér í loftslagsmálum?
„Ég er sem listamaður, áhugasamur um hvernig við umbreytum þekkingu í efnisheild. Hvernig finnum við fyrir þekkingu og hvernig getur þekking sem við finnum fyrir, hvatt til aðgerða?,” segir Ólafur á heimasíðu sinni.
„Ég vona að fólk snerti ísinn á Ráðhústorginu og verði snortið af því. Meira eða minna allir viðurkenna að loftslagsbreytingar eru staðreynd. Ísinn bráðnar. Yfirborð sjávar hækkar. En hvað erum við að gera?”.
Myndir: heimasíða Ólafs Elíassonar: http://olafureliasson.net/icewatch
Sjá nánar um störf IPCC: http://www.unric.org/is/component/content/article/44-oktober-2013/26060-ae-tjaldabaki-hja-loftslagsnefndinni
Um fyrri skýrslur IPCC á þessu ári: http://www.unric.org/is/frettir/26184-ahrif-loftslagsbreytinga-qoafturkraefq