14.janúar 2016. Yfirmenn flóttamanna- og þróunarmála hjá Sameinuðu þjóðunum segja að nauðsynlegt sé að útvega fólki „nauðsynleg úrræði til að endurreisa líf sitt“, ef takast eigi að stemma stigu við fordæmalaust þungum straumi flóttamanna í heiminum.
„Samhengið á milli þróunar og landflótta er skýrt og við verðum takast á við þessar áskoranir sem okkar sameiginlegu ábyrgð,“ segja Helen Clark, forstjóri Þróunarstofnunar Sameinuðu þjóðanna (UNDP) og Filippo Grandi, Flóttamannastjóri Sameinuðu þjóðanna (UNHCR) í sameiginlegri blaðagrein.
Árið 2014 flúðu 42.500 manns heimili sín á hverjum degi vegna átaka og ofsókna. Þetta er fjórum sinnum hærri tala en 2010. Nærri 60 milljónir manna í heiminum hafa hrakist frá heimilum sínum og þarf að leita aftur til Síðari heimsstyrjaldarinnar til að finna sambærilegan fjölda flóttamanna.
Í blaðagreininni sameiginlegu segja embættismennirnir að þetta sé „óásættanlegt en ekki óumflýjanlegt.“
„Í krafti embætta okkar sem yfirmenn flóttamanna- og þróunarstofnana Sameinuðu þjóðanna hvetjum við til þess að þessum tröllauknu umbrotum sé svarað með því að sjá fólki fyrir nauðsynlegum úrræðum til að endurreisa líf sitt. Við teljum að Sjálfbæru þróunarmarkmiðin 2030, sem ríki heims samþykktu samhljóða í september síðastliðnum, séu leiðin til framtíðar.Þar er því heitið „að enginn verði skilinn eftir“ í baráttunni gegn fátækt og ójöfnuði,“ skrifa þróunar- og flóttamannastjórarnir í blaðagreininni.
Clark og Grandi benda á að viðbrögð alþjóðasamfélagsins við landflótta felist aðallega í að veita mannúðaraðstoð. Hins vegar, hafi aðeins um 1% flóttamanna getað snúið heim árið 2014 og mikill meirihluti þeirra verji árum, áratugum eða jafnvel allri ævinni í útlegð.
Þau segja að heimurinn hafi ekki lengur efni á að sóa hæfileikum þessa fólks. „Fyrirsagnir blaðanna minna okkar á mannlegar fórnir þessara 
harmleikja, og okkur ber að hafa hugfast að við getum brugðist við á annan hátt en þeim einum að fyllast skelfingu. Við getum hafnað efnahagslegri útilokun þeirra sem fæðst hafa annars staðar. Við getum stóreflt viðleitni okkar til að finna pólitíska lausnir til að binda enda á átök og ofsóknir. Við getum getum séð til þess að aðilar innan þróunar- og mannúðargeirans taki höndum saman um leið og átök hafa brotist út. Í stuttu máli við getum staðið við það fyrirheit að „skilja engan eftir,“ skrifa Clark og Grandi í lok greinarinnar.
Sjá greinina í heild á ensku hér.
Aðalmynd: UN Photo/Zenebe Teklewold. Konur bíða þess að skrá sig í miðstöð Norska flóttamannaráðsins í Leerhéraði í Suður-Súdan 5.janúar 2016.