Guterres eggjar ESB til aðgerða í loftslagsmálum

0
904
Loftslagsmál
Mynd: Sara Kurfeß - Unsplash

António Guterres aðalframkvæmdastjóri Sameinuðu þjóðanna hvatti Evrópusambandið til þess að skuldbinda sig til metnaðarfyllri aðgerða í loftslagsmálum.  Hvatti hann til að dregið yrði úr losun gróðurhúsalofttegunda um að minnsta kosti 55% fyrir 2030. Guterres flutti inngangsræðu á fundi hugveitunnar Evrópska utanríkismálaráðsins í dag (European Council on Foreign Relations) í dag. 

Hann benti á að nú þegar hefðu Evrópusambandið, Japan og Lýðveldið Kóra heitið því að ná kolefnisjafnvægi fyrir 2050 ásamt 110 öðrum ríkjum. Kína segist ætla að fara að dæmi þeirra fyrir 2060.

Metnaðarfyllri landsmarkmið

„Í byrjun árs 2021 má búast við að ríki sem bera ábyrgð á 65% allrar losunar koltvísýrings hafi skuldbundið sig á metnaðarfullan hátt til að ná kolefnisjafnvægi. Þau standa fyrir 70% af hagkerfi heimsins En við höfum þó enn dregist aftur úr í kapphlaupinu við tímann. Hverju einasta ríki, borg, fjármálastofnun og fyrirtæki ber að setja sér það markmið um að umbreyta starfi sínu með áætlunum um að engin nettó losun verði af henni fyrir 2050.“

Guterres lagði áherslu á að slíkar áætlanir yrðu að sjá dagsins ljós vel tímanlega fyrir COP26, Loftslagsráðstefnu Sameinuðu þjóðanna í nóvmeber á næstar ári. „Þetta á sérstaklega við um Landsmarkmiðin sem kveðið er á um í Parísarsamningnum.“

Afmæli Parísarsamningsins

Sameinuðu þjóðirnar, Bretland og Frakkland gangast fyrir fundi um aukinn metnað í loftslagsmálum á fimm ára afmæli Parísarsamningsins um loftslagsmál.

„Fundurinn verður kjörið tækifæri fyrir Evrópusambandið til að kynna metnaðarfyllri loftslags-áætlanir. Aukinn metnaðar af hálfu G20 felur í sér að aðlaga efnahagsáæatlanir og endurreisn eftir COVID-19 að Heimsmarkmiðunum um sjálfbæra þróun. Evrópusambandið getur verið heiminum fyrirmynd. Það gerir ESB með því að ná kolefnisjafnvægi og auka loftslagsviðnám og tryggt á sama tíma velmegun og réttlát umskipti. Brýnt er að Evrópusambandið skuldbindi sig til að draga úr losun um að minnsta kosti 55% fyrir 2030 í nýjum landsmarkmiðum.“

Engin ný kol

Guterres sagði að ekki bæri að opna einar nýjar kolanámur. „Núverandi kolaiðnað ber að leggja niður smátt og smátt til 2030 í OECD ríkjunum og fyrir 2040 annars staðar. Þessu til viðbótar fer ég fram á það við Evrópusambandið að það hætti að fjármagna jarðefnaeldsneyti á heimsvísu. Ég hvet ESB til að að breyta skattlagningu frá tekjum til kolefnis,“ sagði aðalframkvæmdastjórinn í ávarpi sínu til fundar utanríksráðherra ESB.

Að loknu ávarpi Guterres fóru fram umræður. Þátttakendur voru meðal annars Ann Linde utanríkisráðherra Svía, Michał Kurtyka loftslagsráðherra Pólverja og Barbara Pompili umhverfisráðherra Frakka.