Kvennanefnd Sameinuðu þjóðanna (CSW). Bandaríkin voru eina landið sem greiddi atkvæði gegn drögum að niðurstöðuskjali á ársfundi kvennanefndar Sameinuðu þjóðanna.
Nefndin hóf sinn árlega tíu daga fund 9.mars með óvenju miklum ágreiningi. Ekki var einhugur um lokaskjal sem þó var samþykkt með 37 atkvæðum gegn einu. Bandaríkin greiddu atkvæði á móti eftir að hafa lagt fram breytingartillögur en þau voru andsnúin orðalagi um kynvitund, kyn- og frjósemisheilbrigði og reglugerðum um gervigreind.
Kvennanefndin hélt sinn fyrsta af nokkrum ráðherrafundum á öðrum degi fundarins, 10.mars.
Guterres: Bakslag
„Verum hreinskilin: bakslag hefur orðið því rótgróið vald beitir sér þegar það finnur fyrir því að tökin losna. Og sannanirnar eru allt í kringum okkur,“ sagði António Guterres, aðalframkvæmdastjóri Sameinuðu þjóðanna, í opnunarávarpi sínu á fundi nefndarinnar. „Erfið, fengin lagaleg vernd hefur verið rofin. Ráðist er á mannréttindaverði kvenna. Grafið er undan kyn- og frjósemisheilbrigði og réttindum.“
Frávik frá samstöðu
Hið sjaldgæfa frávik frá samstöðu undirstrikar vaxandi pólitískan ágreining á heimsvísu um kynjaréttindi á sama tíma og alþjóðleg stefna um lagalegt jafnrétti kvenna er mótuð. „Allt hefur verið reynt til að hlusta á sendinefndir og endurspegla fjölbreytileika þeirra skoðana sem komu fram,“ sagði Maritza Chan Valverde (Costa Rica), formaður nefndarinnar.
Eftir að hafa upphaflega setið hjá í samningaviðræðum um niðurstöðuskjalið skiptu Bandaríkin um stefnu á síðustu dögum og hvöttu til þess að „umdeild félagsleg málefni“ yrðu fjarlægð úr skjalinu. Jonathan Shrier fulltrúi Bandaríkjanna sagði að landið gæti ekki stutt texta sem innihéldi „tvírætt orðalag sem ýtir undir kynjahugmyndafræði, óljósar og óskilyrtar skuldbindingar um kyn- og frjósemisheilbrigði sem hægt er að túlka sem vísbendingu um rétt til þungunarrofs, orðalag um ritskoðun eða almennt orðalag um reglugerðir um gervigreind..
Bandaríkin vildu einnig að tilvísanir í loftslagsbreytingar og kynjamiðað réttarkerfi yrðu fjarlægðar og styðja til dæmis ekki fyrirhugaðan skaðabótasjóð fyrir þolendur ofbeldis.
Textinn fékk 37 atkvæði með og 1 á móti (Bandaríkin), en 6 sátu hjá (Fílabeinsströndin, Egyptaland, Malí, Máritanía, Sádi-Arabía).
Madame aðalframkvæmdastjóri
Í opnunarávarpi sínu varaði Sima Bahous, framkvæmdastjóri UN Women, við því að framfarir í átt að jafnrétti væru allt of hægar og sagði að það gæti enn tekið aldir að loka alþjóðlegu bili í lagalegri vernd kvenna og stúlkna.
Með tilliti til vals á næsta aðalframkvæmdastjóra Sameinuðu þjóðanna benti hún einnig á að aðildarríkin stæðu brátt frammi fyrir öðru sögulegu vali.
„Á þessu ári munu fulltrúar kjósa nýjan aðalframkvæmdastjóra,“ sagði hún. „Við hjá UN Women munum vera stolt af því að þjóna og vinna með konu í embætti aðalframkvæmdastjóra.“
Kvennanefndin (CSW) er helsta alþjóðlega stofnun Sameinuðu þjóðanna sem er tileinkuð því að stuðla að jafnrétti kynjanna og réttindum og valdeflingu kvenna. 45 lönd eru kosin í nefndina hverju sinni af Efnahags- og félagsmálaráði Sameinuðu þjóðanna.
CSW var stofnuð árið 1946 og gegnir lykilhlutverki við að setja alþjóðlega staðla um réttindi kvenna og endurskoða framfarir í jafnrétti kynjanna. Nefndin er stærsti alþjóðlegi fundur heims um réttindi kvenna.
Sjá nánar hér.
(Færslan hefur verið uppfærð)