Mýrakalda: Dauðsföllum hefur fækkað um helming

0
451

mýrarkalda

12.desember 2013. Alþjóðleg viðleitni til að útrýma mýraköldu hefur bjargað 3.3 milljónum mannslífa frá árinu 2000.

Tíðni dauðsfalla af völdum mýraköldu eða malaríu hefur minnkað um helming að því er fram kemur í nýrri skýrslu Alþjóðaheilbrigðismálastofnunarinnar, WHO.

Flest dauðsföllin hefðu orðið í þeim tíu ríkjum þar sem dánartíðnin er hæst og lífi barna innan fimm ára hefur verið bjargað – en mýrakalda leggst þyngst á þau. Á sama tíma hefur dánartíðni af völdum mýraköldu “þögla morðingjans” fækkað um 54% í Afríku.

Fagna ber þessum góðu tíðindum en varanlegrar fjármögnunar er einnig þörf að sögn WHO.

“Það er engin ástæða til að sofna á verðinum þrátt fyrir þennan góða árangur” segir Margaret Chan, forstjóri Alþjóða heilbrigðismálastofnunarinnar. “Beinn fjöldi látinna af völdum mýraköldu hefur ekki lækkað eins hratt og hægt væri.”
Tölur benda til að almennur aðgangur að forvörnum og meðferð sé ónógur. Talið er að 3.4 milljarðar manna eigi á hættu að veikjast af mýraköldu, aðallega í Afríku en þar eru 80% sjúkdómstilfella og í suð-austur Asíu.