20.mars 2014. Gleðin er við völd á vettvangi Sameinuðu þjóðanna í dag og með músikina að vopna, eru allir hvattir til að láta sitt ekki eftir liggja.
Sameinuðu þjóðirnar halda upp á Alþjóðlega hamingju daginn í dag í annað skipti. Allir eru hvattir til þess að taka þátt í herferðinni „Hamingjuhljóð“ með því að velja þau lög sem koma hverjum og einum í gott skap á vefnum: og samskiptamiðlum; #HappySoundsLike á Facebook eða Twitter. Í lok dagsins verður svo gleðilisti Sameinuðu þjóðanna birtur.
Ban Ki-moon, aðalframkvæmdastjóri samtakanna gekk á undan með góðu fordæmi og valdi það lag sem kemur honum í gott skap: Signed, sealed and delivered með Stevie Wonder, sérstakum friðarerindreka Sameinuðu þjóðanna.
En hvers vegna tóku Sameinuðu þjóðirnar hamingjuna í sína þjónustu?
Oft er sagt að smáríki hafi lítil áhrif á heimsmálin, en til allrar hamngju eru dæmi um hið gagnstæða.
Aðildarríki Sameinuðu þjóðanna samþykktu árið 2012 að tillögu Bútan að hafa hamingjuna í hávegum 20.mars ár hvert. Ástæðan fyrir því að 20.mars varð fyrir valinu er engin tilviljun því þá eru jafndægur á vori en þá ríkir jafnvægi því nótt og dagur eru jafnlöng.
Forsagan er sú að Bútan sem er ríki í Himalajafjöllum tók fyrir nokkrum árum þá hugmynd upp á sína arma að þróun og velmegun ætti ekki eingöngu að meta í krónum og dollurum, evrum eða pundum. Bútan beitti sér fyrir þessari hugmynd með því að fitja upp á Vergu þjóðarhamingju-vísitölunni. Hefðbundnar vístiölur á borð við verga þjóðarframleiðslu mæla efnahagslegar breytingar en undanskilja mannlega þáttinn í framþróun.
Hamingjuvísitalan er tilraun til þess að setja hið mannlega í forgang í þróunarstarfi með því að spyrja spurningarinnar: “Mun þetta færa okkur hamingju?” Þetta ætti að tryggja að þróun miði að því að bæta hlutskipti mannsins en miði ekki eingöngu að tölulegum gróða.
Í raun kallast þetta á við þá hugmynd Sameinuðu þjóðanna að bæta mannlega þættinum inn í hefðbundna mælikvarða á þróun en það er gert í vísitölu Þróunarstofnunar Sameinuðu þjóðanna (UNDP) um “mannlega þróun” eða UNDP Human Development Index en þar er litið á tölfræði yfir lífslíkur, menntun og tekjur og unnin úr því samsett vísitala