5.september 2016. Góðgerðastarf, rétt eins og sjálfboðaliðastarf og mannúðarstarf almennt geta aukið félagsleg tengsl, bætt samfélagið og dregið úr verstu þjáningum fórnarlamba stríðs og náttúruhamfara.
Í dag er haldið upp á Alþjóða góðgerðadaginn. Þá er þess minnst að góðgerðastarf er oft kærkomin viðbót við opinbera heilsugæslu, menntun og barnavernd, svo eitthvað sé nefnt.
Þá er framlag góðgerðastarfs búhnykkur í menningar og vísindastarfi, íþróttum og í viðleitni til að vernda menningarlegra og náttúrulega arfleifð. Góðgerðastarf eflir réttindi þeirra sem höllustum fæti standa og njóta minnstra forréttinda og breiðir út boðskap mannúðar þar sem átök standa yfir. Í stuttu máli er góðgerðastarf vatn á myllu viðræðu, samstöðu,og gagnkvæms skilnings milli fólks.
Allsherjarþing Sameinuðu þjóðanna samþykkti árið 2012 að 5.september ár hvert skyldi vera Alþóðlegur dagur góðgerða í viðurkenningarskyni við starf góðgerðastamtaka og einstaklinga, þar á meðal Móður Teresu.
Dagurinn 5.september var valinn vegna þess að það er dánardagur Móður Teresu, en hún hlaut friðarverðlaun Nóbels árið 1979 og var tekin í dýrlingatölu af Frans páfa í gær.
Ban Ki-moon, aðalframkvæmdastjóri Sameinuðu þjóðanna leggur áherslu á að góðgerðastarfsemi geti nýst í að ná Heimsmarkmiðunum um Sjálfbæra þróun.
„Góðgerðastarf er eins besta hugsanlega fjárfestingin í sameiginlegri framtíð okkar,” segir Ban í ávarpi á Alþjóða góðgerðadaginn. „Á þessum alþjóðadegi hvet ég fólk um allan heim til að vera hluti af 15 ára bandalagi okkar í þágu mannúðar og aðstoða okkur við að gera Sjálfbæru þróunarmarkmiðin að veruleika fyrir alla íbúa heims.”
Myndir: Börn í Timor-Lesta njóta góðgerða á jólum þökk sé jólagjöfum portúgalskra friðargæsluliða. UN Photo/Martine Perret
Kofi Annan,þáverandi aðalframkvæmdastjóri Sameinuðu þjóðanna hitti Móður Teresu að máli í New York nokkrum mánuðum fyrir lát hennar 1997. UN Photo/Evan Schneider
