Tollar. Bandaríkin.
Yfirmaður viðskipta- og þróunarstofnunar Sameinuðu þjóðanna hefur hvatt til þess að gerðar verði undantekningar vegna fátækustu ríkja heims nú þegar mikill órói er á mörkuðum vegna tollahækkana, einkum í Bandaríkjunum.
Rebeca Grynspan forstjóri UNCTAD bendir á að fátækustu ríkin vegi ekki þungt þegar halli á viðskiptum ríkja við útlönd er annars vegar.
Grynspan er ekki eini yfirmaður Sameinuðu þjóðanna sem hefur látið í ljós áhyggjur af hlutskipti viðkvæmustu þróunarríkja í þeirri óvissu sem nú ríkir.
António Guterres aðalframkvæmdastjóri Sameinuðu þjóðanna sagði á þriðjudag að „viðskiptastríð væru einstaklega neikvæð” og varaði við „skelfilegum” afleiðingum.
Hlutur minnst þróuðu ríkja lítill
Tollar eru skattur sem lagður á vörur sem fluttar eru inn til lands. Þeir eru venjulega hlutfall af virði vöru og leggst aukakostnaðurinn á verðið sem neytandi greiðir.
Forstjóri UNCTAD hefur hvatt Bandaríkin til að endurskoða áætlanir sínar. Hún bendir á að hlutur 44 minnst þróuðu ríkja heims í viðskiptahalla Bandadríkjanna sé innan við tvö prósent. Hærri tollar myndu einungis vera olía á eld skuldakreppu þeirra.
„Þegar tvö helstu hagkerfi heims setja á innflutningstolla, snertir það alla, ekki einungis ríkin, sem eru í tollastríði,“ segir Grynspan. Hún lét í ljós áhyggjur af því að hægjast muni á hjólum efnahagslífs alls heimsins. Minnst þróuðu ríkin bæru enga ábyrgð á viðskiptahalla Bandaríkjanna.
„Stærstur hluti útflutnings þeirra til Bandaríkjanna eru vörur og mikill hluti þeirra er undansklinn samkvæmt nýju reglunum. Þær keppa ekki við innlenda vöru, heldur eru hluti af framleiðsluferli.“