Alþjóðlegur dagur vitundar um matarsóun. Matarsóun og – tap grafa undan sjálfbærni matvælakerfa okkar. Þegar matur tapast eða fer til spillis fara allar auðlindir sem notaðar voru til að framleiða þennan mat – þar á meðal vatn, land, orka, vinnuafl og fjármagn – forgörðum. Alþjóðlegur dagur vitundar um matarsóun er 29.september.
Að auki leiðir förgun matartaps og -úrgangs á urðunarstöðum til losunar gróðurhúsalofttegunda, sem stuðlar að loftslagsbreytingum. Matarmissir og -sóun geta einnig haft neikvæð áhrif á matvælaöryggi og framboð matvæla og stuðlað að hækkun matvælakostnaðar.
Matvælakerfi okkar verða ekki þrautseig ef þau eru ekki sjálfbær. Af þeim sökum er þörf á að innleiða samþættar aðgerðir sem ætlað er að draga úr matarmissi og -sóun. Aðgerðir eru nauðsynlegar á heimsvísu og á hverjum stað fyrir sig til að hámarka nýtingu matvælanna sem við framleiðum.
Innleiðing tækni, nýstárlegra lausna, nýjar vinnuaðferðir og góðar starfsvenjur til að stjórna gæðum matvæla og draga úr matartapi og -sóun eru lykilatriði til að hrinda þessari umbreytingu í framkvæmd.
Fimm ár eru til stefnu til að ná markmiði 12.3 í Heimsmarkmiðunum um sjálfbæra þróun (#12. Ábyrg neysla og framleiðsla). Brýnt að hraða aðgerðum til að draga úr matarmissi og sóun.
Vissir þú..?
- …að á sama tíma og 735 milljónir jarðarbúa líða hungur, má rekja 8-10% losunar gróðurhúsalofttegunda til sóaðra og tapaðra matvæla.
- …að jafnvirði rúmlega eins milljarðs neysluhæfra máltíða fer til spillis á heimilum á hverjum degi. Það þýðir að 1.3 máltíðir fara daglega forgörðum í heimi þar sem hundruð milljóna manna líða hungur.