3.febrúar 2016. Krabbamein herjar á öll ríki heims og er algengasta dauðaorsök í heiminum.
4.febrúar ár hvert er Alþjóðlegi krabbameinsdagurinn haldinn í því skyni að vekja fólk til vitundar um þennan vágest.
„Búseta eða fæðingarstaður hverrar manneskju á ekki að ráða úrslitum um hvort hún lifir eða deyr af völdum þessa sjúkdóms,“ segir Ban Ki-moon, aðalframkvæmdastjóri Sameinuðu þjóðanna í ávarpi sínu í tilefni krabbameinsdagsins.
Hann minnir á að Alheimsmarkmiðin um Sjálfbæra þróun eru eitt af verkfærunum til að bæta heilsugæslu og forvarnir. Þriðja markmiðið um að „Stuðla að heilbrigðu líferni og vellíðan fyrir alla á öllum aldri“, felur í sér að minnka ber um þriðjung fyrir 2030 fjölda þeirra sem deyja af ósmitandi sjúkdómum.
Þema krabbameinsdagsins í ár er „Við getum. Við viljum“. Ekki færri en 30% af öllum krabbameinstilfellum má rekja til fimm mismunandi hegðunar-og neyslu mynstra. Þar á meðal er hátt hlutfall líkamsfitu, of lítil neysla grænmetis og ávaxta, of lítil líkamleg áreynsla auk neyslu tóbaks og áfengis. Tóbaksneysla er stærsti áhættuþátturinn og má rekja 22% dauðsfalla af völdum krabbameins til þess og 71% af lungnakrabbameinstilfellum.
Um 70% af öllum dauðsföllum af völdum krabbameins eru í lág- eða meðaltekjuríkjum. „Krabbamein herjar á öll lönd, en fátækustu ríkin verða harðast úti,“ segir Ban „Ekkert dæmi sýnir þetta skýrar en móðurlífskrabbamein. 8 af 10 nýjum tilfellum eru greind í fátækustu ríkjum heims og þar deyja 9 af hverjum 10.“