Allsherjarþing Sameinuðu þjóðanna hefur samþykkt tillögu um að 16.nóvember verði Alþóðlegur dagur mataræðis Miðjarðarhafsins.
Ítalía bar fram tillöguna fyrir hönd ríkjahóps og var hún samþykkt án atkvæðagreiðslu. Engu að síður heyrðust gagnrýnisraddir. Annars vegar var kvartað yfir hinum mikla fjölda alþjóðlegra daga á vegum Sameinuðu þjóðanna. Hins vegar komu fram efasemdir um að heiðra eina tiltekna matarmenningu umfram aðrar.
Framsögumaðurinn sagði að mataræði Miðjarðarhafssvæðisins fæli í sér hefðbundna þekkingu og félagslegar venjur, sem mótast hefðu kynslóð eftir kynslóð. „Með samþykkt þessa frumkvæðis er hlutverk hefðbundins mataræðis og sjálfbærrar matarmenningar viðurkennt og eflt.”
Heilsusamlegt
Löngu er viðurkennt að mataræði Miðjarðarhafsþjóðanna er heilsusamlegt, einkum eftir merkar rannsóknir Ancel Keys á sjöunda áratug 20.aldar. Þar var sýnt fram á jákvæð áhrif mataræðisins á hjarta og æðasjúkdóma. Jafnframt var sýnt fram á tengsl mataræðisins við minni tíðni sykursýki, ákveðinna krabbameina og þunglyndi.
Fyrir rúmum áratug var Miðjarðarhafs-mataræðið fært á lista UNESCO yfir óáþreifanlega menningarlega arfleifð heimsins. Lögð var áhersla á menningarlegt-, næringarlegt og félagslegt mikilvægi í rökstuðningi.
Ýmsar staðbundnar útgáfur eru af mataræðinu við Miðjarðarhaf, en ákveðin grundvallar-einkenni eru sameiginleg. Áhersla er á ferska ávexti og grænmeti. Auk þess eru heilkornavörur, hnetur, belgjurtir og ólífuolía í öndvegi. Einnig má nefna hóflega neyslu á sjávarfangi, alifuglum, mjólkurvörum, kjöti og eggjum og takmarkað sælgæti.