Mislingar. Alþjóða heilbrigðismálastofnunin hefur áhyggjur af mislingafaraldri í Evrópu en tvöfalt fleiri tilfelli voru tilkynnt 2024 en árið á undan.
127 þúsund mislingatilfelli voru skráð og er það mesti fjöldi frá 1997. Alþjóða heilbrigðismálastofnunin (WHO) og UNICEF, Barnahjálp Sameinuðu þjóðanna, vara við því að fækkun bólusetninga geti haft í för með sér enn meiri aukningu smita ef ekki verði gripið í taumana.
Fáir sjúkdómar eru eins bráðsmitandi og mislingar. Þeir geta valdið alvarlegum heilbrigðisvandamálum á borð við lungnabólgu, heilabólgu, niðurgangspest og ofþornun. Þar að auki getur sjúkdómurinn valdið blindu og veikt ónæmiskerfið og gert sjúklinga þar með útsetta fyrir öðrum smitum.
Vaxandi heilbrigðisvandi
Stór hluti smitaðra eru börn undir fimm ára aldri. Rúmlega helmingur skrásettra tilfella hafa orðið að leggjast inn á sjúkrahús. Bráðabirgðatölur benda til að 38 hafi látið lífið. Mislingatilfellum hefur fækkað svo árum skiptir en nú breiðast þeir hratt út í Evrópu. Mislingafaraldrar urðu 2018 og 2019 en frá þeim tíma hefur bólusetningadekkning minnkað i mörgum ríkjum. Það hefur síðan aukið hættuna á nýjum faröldrum.
„Ef verulegur hluti fólks er ekki bólusettur er ekki hægt að tryggja heilbrigði,“ segir Dr. Hans Henri P. Kluge forstjóri Alþjóða heilbrigðismálastofnunarinnar (WHO) í Evrópu. Kluge hvetur til samhæfðs átaks til að ná til þeirra hópa sem ekki hafa verið bólusettir og koma í veg fyrir enn meiri smit.
Árið 2023 fékk hálf milljón barna í Evrópu ekki fyrsta skammt bólusetningar við mislingum (MCV1). Í nokkrum ríkjum er lágt hlutfall bólusettra til dæmis, í Bosníu-Hersegóvínu og Svartfjallalandi. Þar er hlutfallið undir 95% sem mælt er með til að skapa hjarðónæmi. Þá hafa Rúmenía og Norður-Makedónía átt í erfiðelikum með að ná lágmarkinu. Flest skrásett smit voru í Rúmeníu 2024 eða 30 þúsund. Þriðjungur mislingatilfella í heiminum í fyrra var í Evrópu.