Mislingar. Mislingatilfellum í Evrópu og Mið-Asíu fækkaði umtalsvert árið 2025 miðað við árið á undan. Þetta kemur fram í talnaefni sem Alþjóða heilbrigðismálastofnunin (WHO) hefur sent frá sér. Það nær yfir 53 ríki á Evrópusvæði WHO, sem nær einnig til Mið-Asíurríkja. Hætta á faraldri er þó enn til staðar að mati WHO og UNICEF, Barnahjálpar Sameinuðu þjóðanna.
Rétt tæplega 34 þúsund tilfelli voru skráð í þessum löndum 2025 eða nærri 75% færri en árið 2025. Fækkunin er sumpart rakin til viðbragða yfirvalda, en einnig til þess að færri eru berskjaldaðir því veiran hefur þegar náð til stórs hluta óbólusettra.
Mörg mislingatilfelli hefði verið hægt að koma í veg fyrir ef fleiri hefðu verið bólusettir og fyrr hefði verið brugðist við.
„Þótt tilfellum hafi fækkað eru aðstæður sem leiddu til endurvakningar þessa banvæna sjúkdóms á undanförnum árum enn til staðar og þarf að bregðast við þeim,” segir Regina De Dominicis forstöðumaður UNICEF í Evrópu og MIð-Asíu. Hún segir að bregðast þurfi útbreiðslu rangra upplýsinga, sem fæli fólk frá því að láta bólusetja börnin.
Ennþá fleiri tilfelli en áður
Fjöldi mislingatilfella árið 2025 var hærri en flest ár frá því árið 2000. Í sumum löndum var reyndar fjölgun á milli áranna 2024 og 2025.
„Mislingatilfellum fækkaði um næstum 75% á síðasta ári, en hætta á faraldri er enn til staðar,” segir Hans Henri P. Kluge forstjóri WHO í Evrópu. „Rúmlega 200 þúsund manns í okkar heimshluta veiktust af mislingum á síðustu þremur árum. Þessi bráðsmitandi veira mun halda áfram að breiðast út þangað til öll samfélög ná 95% bólusetningarhlutfalli.”
Tólf sinnum meira smitandi en inflúensa
Fyrir hvern einstakling sem er með mislinga smitast allt að 18 aðrir óbólusettir einstaklingar. Þetta gerir mislinga um 12 sinnum meira smitandi en inflúensa. Auk sjúkrahúsinnlagnar og dauða geta mislingar valdið langtíma, lamandi heilsufarsvandamálum. Þeir geta einnig skaðað ónæmiskerfið með því að „þurrka út“ minni þess um hvernig á að berjast gegn sýkingum í marga mánuði eða jafnvel ár, sem gerir þá sem lifa af mislinga viðkvæma fyrir öðrum sjúkdómum og dauða.
97% ævilöng vörn
Tveir skammtar af bóluefni sem inniheldur mislinga veita allt að 97% ævilanga vörn gegn mislingum. 95% bólusetningarhlutfall með tveimur skömmtum af mislingabóluefninu í hverju samfélagi á hverju ári er nauðsynlegt til að koma í veg fyrir mislingaútbrot og ná hjarðónæmi. Slíkt verndar ungbörn sem eru of ung til mislingabólusetningar og annað fólk sem ekki er bólusett af læknisfræðilegum ástæðum svo sem þeir sem eru með skert ónæmiskerfi.