Nýársávarp aðalframkvæmdastjóra Sameinuðu þjóðanna. 2025.
Síðustu tíu ár hafa verið heitustu tíu ár sögunnar, þar á meðal árið 2024. Þetta kemur fram í nýársávarpi António Guterres aðalframkvæmdastjóra Sameinuðu þjóðanna. Í ávarpinu hvetur hann þjóðir heims til að láta komandi ár marka nýtt upphaf.
Ávarpið fer hér á eftir:
Nýársávarp aðalframkvæmdastjóra Sameinuðu þjóðanna
Allt árið 2024 hefur verið erfitt að finna von. Styrjaldarátök hafa valdið hrikalegum sársauka og þjáningu og fólk hefur hrakist á flótta. Ójöfnuður og sundrung hafa þrifist og sáð hefur verið fræjum spennu og vantrausts.
Og í dag get ég tilkynnt opinberlega að við höfum nú að baki okkar áratug banvæns hita.
Síðustu 10 ár eru heitustu ár sem um getur, þar á meðal árið 2024.
Við höfum upplifað hrun loftslagsins í beinni útsendingu.
Við verðum að sveigja af leið eyðileggingar og við megum engan tíma missa.
Árið 2025 verða ríki heims að beina heiminum inn á öruggari braut, með því að skera rækilega niður losun og styðja umskipti yfir til framtíðar endurnýjanlegra orkugjafa.
Slíkt er þýðingarmikið og mögulegt.
Vonir um breytingar
Jafnvel á myrkustu dögum, hef ég sé von knýja fram breytingar.
Ég hef séð von í líki baráttufólks, ungs og gamals, sem hafa gefið framförum rödd.
Ég hef séð vonina í mannúðarstarfsfólki sem hefur unnið hetjudáðir með því að sigrast á tröllauknum hindrunum til að koma þeim, sem höllustum standa fæti, til hjálpar.
Ég hef séð von í þróunarríkjum, sem berjast fyrir fjárhagslegu réttlæti í loftslagsmálum.
Ég hef séð vonina í hópi vísindamanna og uppfinningamanna, sem hafa brotið nýtt land í þágu mannkynsins.
Sáttmáli framtíðarinnar
Og ég sá von í september, þegar veraldarleiðtogar komu saman til að samþykkja Sáttmála framtíðarinnar.
Sáttmálinn er nýtt átak til að stuðla að friði með afvopnun og til að koma í veg fyrir átök
Hann stuðlar að umbótum á alþjóðlega fjármálakerfinu með það fyrir augum að það styðji og endurspegli öll ríki.
Sáttmálinn er lóð á vogarskálar aukinna tækifæra fyrir konur og ungt fólk.
Með honum eru settar skorður við nýrri tækni í því skyni að fólk sé í fyrirrúmi en ekki gróði; og réttindi verði í forgangi en ekki glórulausir algóryþþmar.
Og ætíð er í honum haldið fast við gildi og meginsjónarmið mannréttinda, alþjóðalaga og Stofnskrár Sameinuðu þjóðanna.
Engar tryggingar
Það eru engar tryggingar fyrir því hvað árið 2025 ber í skauti sér.
En ég heiti því að styðja við bakið á öllum þeim sem vilja stuðla að friðsælli, jafnari, stöðugari og heilbrigðari framtíð fyrir alla jarðarbúa.
Við getum í sameiningu látið árið 2025 marka nýtt upphafi.
Ekki sem sundraður heimur, heldur sem sameinaðar þjóðir.
Sjá einnig hér og hér