SDG fagnar SDG

0
519
SDG

SDG

27.september 2015. Sigmundur Davíð Gunnlaugsson, forsætisráðherra ávarpaði í gær leiðtogafund aðildarríkja Sameinuðu þjóðanna (SÞ) þar sem samþykkt voru ný heimsmarkmið allra 193 aðildarríkja SÞ um sjálfbæra þróun. Svo skemmtilega vill til að skammstöfun Sjálfbæru þróunarmarkmiðanna á ensku er SDG, og er samhljóða upphafsstöfum forsætisráðherrans. 

Forsætisráðherra fagnaði samþykkt nýju heimsmarkmiðanna og kvað þau vera til marks um kraft alþjóðlegrar samvinnu.  Í ávarpi sínu lagði forsætisráðherra m.a. áherslu á jafngildi markmiðanna og að árangur á einu sviði gæti liðkað fyrir árangri á öðru sviði. Lagði hann m.a. áherslu á mikilvægi  endurnýjanlegrar orku, stöðvun landeyðingar, sjálfbæra nýtingu og verndun hafsins, jafnrétti kynjanna og framfarir í lækningu sjúkdóma og skaða á taugakerfinu.

Forsætisráðherra kom inn á mikilvægi þess að heimsmarkmiðin fjalli einnig um margvíslegar ástæður fólksflutninga og þörf alþjóðlegrar samvinnu því tengdu. Þá gerði forsætisráðherra grein  fyrir fyrirætlunum Íslands í samstarfi við Evrópusambandið og Noreg um að draga úr losun gróðurhúsaloftegunda um 40%. 

Heimsmarkmiðin eru sautján með 169 undirmarkmiðum. Þau taka gildi árið 2016 og gilda til ársins 2030. Markmiðin, ásamt pólitískri yfirlýsingu, áætlun um framkvæmd og eftirfylgni ná yfir afar vítt svið. Með samþykkt þeirra er stefnt að því að útrýma fátækt, tryggja velmegun, mannréttindi og jafnrétti um allan heim – með hliðsjón af umhverfi okkar. Enginn verður skilinn eftir – er rauður þráður markmiðanna.

(Heimild: Forsætisráðuneytið. Ávarpið í heild er hér og myndbandsupptaka er hér en spóla þarf á 2:13.00)