Friðargæsluliðar Sameinuðu þjóðanna á Fílabeinsströndinni (Côte d’Ivoire) gripu til hernaðaraðgerða á mánudag 4. apríl með stuðningi franskra hersveita í því skyni að hindra notkun þungavopna gegn óbreyttum borgurum. Framkvæmdastjóri samtakanna, Ban Ki-moon fyrirskipaði þeim að grípa til “allra tiltækra ráða” til að verja sjálfa sig og saklausa óbreytta borgara nú þegar ástandið í Vestur-Afríkuríkinu hefur enn versnað til muna.
Átök hafa harðnað á milli sveita sem eru hliðhollar lýðræðislega kjörnum forseta Alassane Ouattara og fráfarandi leiðtoga Laurent Gbagbo. Ouattara nýtur viðurkenningar Sameinuðu þjóðanna.
“Þetta er bein afleiðing þess að Gbagbo hefur neitað að afsala sér völdum til Ouattara forseta á friðsamlegan hátt”, segir í yfirlýsingu framkvæmdastjórans. “Landið hefur orðið sokkið í hyldýpi ofbeldis og mikið mannfall orðið meðal óbreyttra borgara.”
Síðustu daga hafa sveitir hliðholla Gbagbo beitt þungavopnum svo sem sprengjuvörpum og stórum vélbyssum gegn óbreyttum borgurum í Abidjan, viðskiptahöfuðborg landsins.
Þessar sveitir hafa ráðist á höfuðstöðvar sveita Sameinuðu þjóðanna UNOCI. Fjórir friðargæsluliðar hafa særst í þessum árásum. Að auki hefur verið ráðist á sveitir UNOCI sem verndað hafa óbreytta borgara og á bílalestir sem flutt hafa særða á sjúkrahús. Enn fleiri friðargæsluliðar hafa særst í slíkum árásum. Af þessum sökum fyrirskipaði Ban hinum friðargæsluliðunum átta þúsund í sveitum UNOCI að beita öllum tiltækum ráðum til að hindra notkun þungavopna með stuðningi franskra sveita, með skírskotun til fyrri samþykkta Öryggisráðs Sameinuðu þjóðanna.
“Ég vil leggja áherslu á að UNOCI er ekki stríðsaðili,” sagði Ban. “Sveitin hefur gripið til þessara aðgerða í sjálfsvörn og til að verja borgara í samræmi við ályktanir öryggisráðsins.”