Kynbundið ofbeldi. Jafnréttisstofnun Sameinuðu þjóðanna (UN Women) varaði við því á mánudag að niðurskurður í fjárveitingum sé að valda þeim samtökum miklum búsifjum sem vinna að því að binda enda á ofbeldi gegn konum og stúlkum.
Ný skýrsla frá UN Women, Í hættu og fjársvelt (At Risk and Underfunded), sem byggir á alþjóðlegri könnun meðal 428 kvenna- og borgaralegra samtaka, sýnir að einu af hverjum þremur verkefnum sem miða að því að binda enda á kynbundið ofbeldi, hefur verið frestað eða lokað.
Meira en 40 prósent hafa dregið úr eða lokað nauðsynlegri þjónustu eins og athvörfum, lögfræðiaðstoð, sál-félagslegri aðstoð og heilbrigðisþjónustu vegna bráðs fjárskorts.
Kynbundið ofbeldi: 80% fá minni þjónustu
Næstum 80 prósent sögðust hafa fengið minni aðgang að þjónustu fyrir þolendur, en 59 prósent sögðu að refsileysi og ofbeldi væru að aukast.
„Kvenréttindasamtök eru burðarásar baráttunnar gegn ofbeldi gegn konum, en þau hefur verið ýtt fram á bjargbrún,“ sagði Kalliopi Mingeirou, yfirmaður deildar Jafnréttisstofnunarinnar sem sinnir ofbeldi gegn konum og stúlkum.
„Við getum ekki leyft niðurskurði í fjárveitingum að upprmt áratuga árangri. Við hvetjum stjórnvöld og styrktaraðila til að auka fjárveitingar og gera þær sveigjanlegri. Án stöðugrar fjárfestingar mun ofbeldi gegn konum og stúlkum aðeins aukast.“
Ofbeldi gegn konum er enn eitt útbreiddasta mannréttindabrot heims.
Um 736 milljónir kvenna – næstum ein af hverjum þremur – hafa orðið fyrir líkamlegu eða kynferðislegu ofbeldi, oftast af hálfu náins maka, samkvæmt gögnum frá UN Women.
Slæmar horfur
Aðeins fimm prósent af stofnunum sem könnunin náði til sögðust geta haldið áfram starfsemi í meira en tvö ár og 85 prósent spáðu alvarlegu bakslagi í vernd fyrir konur og stúlkur. Yfir helmingur lýsti einnig yfir alvarlegum áhyggjum af því að vaxandi hætta steðjaði að kvenréttindafrömuðum.
Í skýrslunni er varað við því að þessi fjárskortur væri samfara aukinni andspyrnu gegn réttindum kvenna, sem greind hefur verið í einu af hverjum fjórum löndum.
Skýrslan „Í hættu og fjársvelt” kemur út á sama tíma og 30 ára afmælis Peking-yfirlýsingarinnar og aðgerðaáætlunar hennar er minnst. Hún er talin tímamótaáætlun fyrir jafnrétti kynjanna þar sem áhersla var lögð á að uppræta ofbeldi gegn konum.