Gasasvæðið. Vannæring. Fjölmargar mæður, sem liðið hafa sult á Gasasvæðinu, fæða börn í undirþyngd eða fyrir tímann. Mörg þeirra deyja skömmu eftir fæðingu á gjörgæsludeild eða berjast fyrir lífi sínu af völdum vannæringar að sögn UNICEF, Barnahjálpar Sameinuðu þjóðanna.
Tess Ingram samskiptastjóri UNICEF, sem er á Gasa, segir að ekki færri en 165 börn hafi dáið á sársaukafullan hátt að óþörfu vegna vannæringar á meðan átök stóðu yfir á milli Ísraels og Hamas.
Vannæring: nýburar innan við 1 kíló
Minna þekkt eru áhrif hungurs, sem barnshafandi og mjólkandi konur hafa liðið, á þúsundir nýbura.
„Ég hef séð fjölmörg börn á sjúkrahúsunum á Gasa, sem eru innan við eitt kíló. Svo erfitt hafa þau átt um andardrátt að þau rétt geta bifað örsmáum bringunum með erfðileikum til að soga að sér súrefni og lifa,“ sagði Ingram.
Börn í undirþyngd eru 20 sinnum líklegri til að deyja en börn í eðlilegri þyngd.
„Undirþyngd má yfirleitt rekja til þess að móðirin hafi ekki fengið næga næringu, hafi orðið fyrir miklu álagi og notið lítillar mæðraþjónustu,“ útskýrir Ingram en allt þrennt á við á Gasasvæðinu.
„Ekkert barn ætti að þola að vera merkt stríði áður en það dregur andann í fyrsta skipti,“ sagði hún, og bendir á grimmilegar aðstæður stríðsins. Þær miklu hindranir á veitingu mannúðaraðstoðar, sem Ísraelar komu upp, „grófu undan þjónustu sjúkrahúsa og ollu hungri og álagi á mæður.“
Gasasvæðið: WFP krefst þess að hindranir verði aflagðar
Aðstæður hafa batnað frá því vopnahléi var komið á í október. Hætta á hungursneyð hefur minnkað. Langt er þó frá því að næg matvæli berist, hvað þá að þau séu nægilega fjölbreytt og fersk.
Matur, hjúkrunargögn og tjöld eru af skornum skammti vegna takmarkana Ísraela. Óttast er að átök blossi upp að nýju, þrátt fyrir vopnahlé, með enn meiri hindrunum.
Slíkt væri skelfilegt því á þessari stundu hafa aðeins 56% Gasabúa fullnægjandi aðgang að drykkjarvatni. 72% verða að gera sér að góðu að hafa ófullkomna salernisaðstöðu. Fyrir utan vannæringu, glíma börn við öndunarsjúkdóma, niðurgangspest og húðsjúkdóma.
Úrhellisrigningar herja á Gasasvæðið
Miklar rigningar um miðjan nóvember eru fyrirboði þess sem vænta má þegar vetur konungur gengur í garð. Skolp tók að flæða um allt með þeim afleiðingum að lífið var nánast óbærilegt fyrir þúsundir uppflosnaðra fjölskyldna. Þær hafast flestar við í tjöldum nærri strandlengjunni. 13 þúsund heimili urðu fyrir barðinu á þessum hörmungum að sögn Mannúðarmálaskrifstofu Sameinuðu þjóðanna (OCHA).
„Flestir íbúanna hafa orðið að yfirgefa heimli sínu. Aðgangur þeirra að helstu nauðsynjum og þjónustu er mjög takmarkaður eða hreinlega enginn. Og vont veður gerir vitaskuld illt verra,“ segir Kate Newton hjá Matvælaáætlun Sameinuðu þjóðanna (WFP) í Palestínu.
Nú þegar versnandi veður er líklega handan við hornið er WFP staðráðið í að undirbúa Gasabúa eins vel og auðið er fyrir vetrarveður. „Við reynum að sjá til þess ásamt samstarfsaðilum okkar að fólk hafi ábreiður, föt og dýnur og annað sem það vanhagar um,“ sagði hún. „Ástandið er hreinlega skelfilegt.“
Öryggisleysi setur einnig strik í reikninginn. „Það er enn erfitt og hættulegt að koma matvælum til Gasa,” segir Newton.
Hindranir Ísraels á flutning mannúðaraðstoðar eru gríðarlegt vandamál.
„Allt sem má ímynda sér að geti þjónað fleiri en einum tilgangi er bannað að flytja“, bendir Newton á. Dæmi um það eru tjöld með álrömmum og og færanlegar geymslueiningar. Margt sem er nauðsynlegt til að endurreisa innviði og greiða fyrir endurreisn er ekki leyft. „Við getum ekki einu sinni flutt varahluti í vörubíla okkar,“ segir Newton.