Verja þyrfti andvirði 93 milljarða Bandaríkjadala til að binda enda á hungur í heiminum fyrir árið 2030. Þótt það sé há fjárhæð er hún aðeins innan við 1% af hernaðarútgjöldum heimsins, sem hafa verið um 22 milljón milljónir undanfarinn áratug að sögn Matvælaáætlunar Sameinuðu þjóðanna (WFP).
Í yfirliti Matvælaáætlunar Sameinuðu þjóðanna (WFP) fyrir árið 2026 er því spáð að 318 milljónir manna kunni að líða hungur á næsta ári. Þetta eru tvöfalt fleiri en árið 2019.
Á sama tíma hafa minnkandi fjárveitingar neytt WFP til að forgangsraða. Reynt verður að aðstoða þann þriðjung hungraðra í heiminum sem eru í mestri neyð. WFP stefnir að því að koma 110 milljónum til hjálpar. Til þess þarf stofnunin 13 milljarða Bandaríkjadala.
Miðað við núverandi framlög kann WFP hins vegar einungis að fá helming þeirrar fjárhæðar. „Það eru hinir fátækustu sem gjalda hæsta verðið,” sagði Amina Mohammed vara-aðalframkvæmdastjóri Sameinuðu þjóðanna þegar yfirlitið var kynnt.
WFP er líflína
„WFP er björgunarhringur fólks í framlínu átaka og veðurfarshamafara, auk þeirra sem neyðast til að flýja heimili sín. Við erum að umbreyta starfi okkar hvað varðar fjárfestingar í langtíma lausnum til að taka á matvæla-óöryggi“, Cindy McCain forstjóri WFP.
Árið 2026 áætlar stofnunin að hjálpa 110 miljónum með neyðarmatvælaaðstoð, fæðubótaefnum, og langtíma stuðningi til að styðja innlend kerfi.
„Heimurinn þarf að glíma samtímis við hungursneyð á Gasa og í hlutum Súdans. Þetta er óásættanlegt á tuttugustu og fyrstu öldinni,“ sagði McCain.
„Hungur hefur skotið rótum víða um heim. WFP hefur ítrekað sýnt fram á að snemmbærar, skilvirkar og útsjónarsamar lausnir geta bjargað og breytt mannslífum. En við þurfum sárlega á meiri stuðning að halda til að sinna áfram þessu mikilvæga starfi.“
Amina Mohammed bætti við að fjárfestingar í loftslagsaðlögun, friðarviðleitni og stuðningi við staðbundna markaði væru á meðal forgansatriða í baráttunni við hungur í heiminum.