80. allsherjarþing Sameinuðu þjóðanna.Palestína. Palestínuríki. Frakkland lýsti yfir viðurkenningu á Palestínu sem sjálfstæðu ríki á ráðstefnu Sameinuðu þjóðanna um tveggja ríkja lausnina á Palestínumálinu 22.september í tengslum við yfirstandandi 80.allsherjarþing Sameinuðu þjóðanna.
„Með því að viðurkenna lögmæt réttindi palestínsku þjóðarinnar eru engin réttindi tekin af ísraelsku þjóðinni, sem Frakkland hefur stutt frá upphafi,“ sagði Emmanuel Macron forseti Frakklands. „Af þesum sökum erum við sannfærð um að viðurkenning sé eina lausnin sem greiðir fyrir því að Ísrael lifi við frið.“
Daginn áður höfðu Bretland, Ástralía, Kanada og Portúgal viðurkennt palestínska ríkið.
„Palestínumenn hafa rétt á ríki, þetta er ekki umbun,“ sagði António Guterres aðalframkvæmdastjóri Sameinuðu þjóðanna á ráðstefnunni.
„Að neita þeim um ríki vatn á myllu öfgamanna hvarvetna. Án tveggja ríkja verður enginn friður í Mið-Austurlöndum og róttækni mun breiðast út um allan heim.“
Diplómatísk viðleitni
Frumkvæði Frakka er hluti af umfangsmeiri diplómatískri viðleitni þeirra í samvinnu við Sádi Arabíu.
Í lok júlí voru ríkin tvö í forsæti ráðstefnu Sameinuðu þjóðanna um tveggja ríkja lausn, sem um hundrað sendinefndir sóttu. Það er sú ráðstefna sem kom saman á ný til fundar í tengslum við 80.allsherjarþingið.
Niðurstaðan fyrsta fundarins var svokölluð New York-yfirlýsing. Hún er vegvísir um varanlega lausn deilu Ísraela og Palestínumanna, þar sem Hamas er útilokað frá viðræðum. Sú yfirlýsing var síðan samþykkt af allsherjarþinginu sem ályktun 12. september 2025.
Mismunandi afstaða Norðurlanda
Á síðasta ári viðurkenndu ríki á borð við Noreg, Spán, Írland, Slóveníu og Mexíkó Palestínu. Ísland og Svíþjóð höfðu gert það 2014.
Danmörk og Finnland hafa ekki viðurkennt Palestínu. Lars Løkke Rasmussen utanríkisráðherra segir að vilji sé fyrir hendi en hefur sett ströng skilyrði; allt frá lausn gísla til að Palestínskt ríki verði afvopnað.
Búist er við að ýmis ríki ætla að bætast í hóp þeirra sem viðurkennt hafa Palestínu í tengslum við yfirstandandi 80 allsherjarþing Sameinuðu þjóðanna. Áður en það hófst höfðu 148 af 193 aðildarríkjum Sameinuðu þjóðanna viðurkennt Palestínuríkið.
Til samanburðar viðurkenna 165 aðildarríki Ísrael.
Viðurkenning í smáum skrefum frá 1988
Frelsishreyfing Palestínu (PLO) lýsti yfir stofnun sjálfstæðs Palestínuríkis í Alsírborg 15.nóvember 1988. Alsír varð fyrst ríkja til að viðurkenna það.
Um fimmtíu ríki fylgdu strax í kjölfarið. Þau voru aðallega innan vébanda Arababandalagsins, og þáverandi fylgiríki Sovétríkjanna, auk ýmissa Afríku- og Asíuríkja.
Nokkrar bylgjur komu síðar og ber þar hæst að 2010 og 2011 viðurkenndu flest Mið- og Suður-Ameríkuríki Palestínu.
ESB 16 af 27 viðurkenna Palestínu
Búlgaría, Pólland, Rúmenía, Slóvakía, Tékkland og Ungverjaland, auk Kýpur höfðu, viðurkennt ríkiið áður en þau gengu til liðs við Evrópusambandið.
Tæknilega var Svíþjóð því fyrsta ríkið innan ESB til að viðurkenna Palestínuríkið. Eftir tilkynningar undanfarinna daga hafa 16 af 27 ESB ríkjum því viðurkennt, þótt Ungverjaland og Tékkland hafi leitast við að afturkalla viðurkenningu.
Af 54 aðildarríkjum Afríkusambandsins hafa aðeins Erítrea og Kamerún ekki viðurkennt Palestínu.
Palestínuríki og Sameinuðu þjóðirnar
Að tillögu Alsír varð Palestína aðildarríki UNESCO 2011. Bandaríkin hættu fjárframlögum til stofnunarinnar í mótmælaskyni. Bandaríkin sögðu sig úr UNESCO 2017, gengu til liðs á ný í forsetatíð Joe Bidens og hættu enn á ný eftir að Donald Trump komst til valda 2025.
Palestínuríki fékk áheyrnaraðild að Sameinuðu þjóðunum 29.nóvember 2012. 138 aðildarríki greiddu atkvæði með tillögu þess efnis, 9 voru á móti og 41 ríki sat hjá.
Árið 2015 varð Palestína aðili að Rómarsamningnum um Alþjóða glæpadómstólinn. Ríkið hefur áherynaraðild að Alþjóða heilbrigðismálastofnuninni (WHO), og aukaaðild að Ráðstefnu Sameinuðu þjóðanna um viðskipti og þróun (UNCTAD) og er meðlimur í Samtökunum um bann við efnavopnum (OPCW) frá 2018.