Átök og fólksflótti eru að auka á hættuna á hungursneyð í Suður-Súdan Þar búa 7,8 milljónir manna við mikið fæðuóöryggi á meðan 2,2 milljónir barna þjást af bráðri vannæringu. Þetta kemur fram í sameiginlegri yfirlýsingu frá stofnunum Sameinuðu þjóðanna á þriðjudag.
56 prósenta íbúa Suður-Súdan munu glíma við mikið fæðuóöryggi frá miðjum apríl og júlí 2026. Óttast er að það nái 3. stigi eða hærra á alþjóðlega hungursflokkunarkerfinu, IPC.
Af þeim sem spáð er að muni búa við brátt fæðuóöryggi, eru 73.300 manns á hamfarastigi (5. stig), sem er alvarlegasta stigið samkvæmt alþjóðlega viðvörunarkerfinu. Þetta er gríðarleg 160 prósenta aukning frá síðasta mati.
Stofnanir Sameinuðu þjóðanna sögðu að vandinn stafaði af vaxandi átökum, fjöldaflótta, efnahagssamdrætti, loftslagsáföllum, flóðum og landbúnaðarframleiðslu undir getu.
Á sama tíma eru 2,5 milljónir manna á IPC 4. stigi – neyðarstigi, og 5,3 milljónir eru í krísu (IPC 3. stig).
Skortur á þjónustu
Í Jonglei-fylki einu saman hafa næstum 300.000 manns verið á flótta, sem hefur skilið mörg samfélög eftir án aðgangs að mannúðaraðstoð, á meðan hækkandi matvælaverð, röskun á mörkuðum og veikur kaupmáttur heimila dýpka fæðuóöryggið enn frekar.
Á sama tíma er bráð vannæring að versna í Suður-Súdan vegna skorts á aðgangi að heilbrigðis- og næringarþjónustu sem hefur skemmst eða verið lokað vegna átaka.
Að auki hefur skortur á birgðum og fjármagni dregið úr aðgangi að lífsnauðsynlegri meðferð. Sjúkdómafaraldrar, þar á meðal kólera, malaría og mislingar, auka á vandann, sérstaklega meðal viðkvæmra og þegar bráðvannærðra barna.
Hætta á hungursneyð
Stofnanir Sameinuðu þjóðanna vara við raunverulegri hættu á hungursneyð í fjórum sýslum í fylkjunum Upper Nile og Jonglei.
Mannúðaraðstoð hefur vería aukin á sumum svæðum, en umfang hennar er enn ójafnt, þar sem sum samfélög eru enn óaðgengileg og fá litla eða enga aðstoð.
„Frá áramótum höfum við séð verulega aukningu átaka í Jonglei og Upper Nile og ítrekaðar hindranir í tilraunum okkar til að ná til fólks á þessum svæðum,“ sagði Ross Smith, yfirmaður neyðaraðgerða og viðbúnaðar hjá WFP.
„Við erum nú í kapphlaupi við tímann til að flýta fyrir og auka sendingar okkar til afskekktra staða í aðdraganda snemmbúinnar regntíðar,“ bætti hann við.
Börnin bera byrðarnar
Hjá börnum hefur næringarástandið haldið áfram að versna. Fjöldi barna á aldrinum sex mánaða til fimm ára sem búa við bráða vannæringu hefur aukist um 100.000 tilfelli miðað við fyrir sex mánuðum.
Fram í júlí á þessu ári er spáð að 700.000 börn muni búa við alvarlega bráða vannæringu, sem er banvænasta formið. Sömuleiðis eru 1,2 milljónir þungaðra kvenna og kvenna með börn á brjósti bráðvannærðar, sem setur bæði mæður og ungbörn í aukna hættu.
„Átökin bitna harðast á konum og börnum. Þessi börn eru framtíð landsins, en án bráðrar aðstoðar er sú framtíð í hættu,“ sagði herra Smith.
Sameinuðu þjóðirnar hvetja alþjóðasamfélagið og stjórnvöld til að bregðast strax við, en brýna þörf er á fjármagni til að koma í veg fyrir frekari versnun og styðja við matvælaaðstoð, næringaráætlanir, hreint vatn og hreinlætisaðstöðu og heilbrigðisþjónustu.