30.október 2015. Ísland hefur skilið eftir sig töluverð spor á vettvangi Sameinuðu þjóðanna ef marka má þann fjölda mynda af Íslendingum sem eru í fórum samtakanna. Við birtum brot af því besta nú þegar þess er minnst að sjötíu ár eru liðin frá stofnun Sameinuðu þjóðanna
Á myndinni að ofan eru frá hægri Thor Thors, sendiherra, Kristján Albertsson, Sigurður Bjarnason, Stefán Pjetursson, Þórarinn Þórarinsson og Hannes Kjartansson á allsherjarþinginu 1960.
Ísland hafnaði boði um að gerast einn af stofnendum Sameinuðu þjóðanna vegna skilyrðis um að lýsa yfir stríði, eins og rakið er í grein í afmælisútgáfu Norræna vefrits UNRIC. Ísland, Afganistan og Svíþjóð gengu loks í Sameinuðu þjóðirnar og var íslenski fáninn dreginn að hún við bráðabirgða-höfuðstöðvar samtakanna í Flushing Meadows 19.nóvember 1946.
Thor Thors, var sendiherra Íslands hjá Sameinuðu þjóðunum frá 1947 til 1965 og er ítarlega fjallað um feril hans í fyrrnefndu fréttabréfi. Kristján Albertsson, sat mörg allsherjarþing og hér sést hann á sjöunda allsherjarþinginu árið 1952.
Pétur J. Thorsteinsson, sat í sjötta nefnd á allsherjarþinginu 1953 og sést hér með kollegum sínum frá Indlandi og Íran.
Íslendingar hafa lagt gjörva hönd á margt sem starfsmenn Sameinuðuþjóðanna og í fórum samtakanna er þessi mynd frá vopnahléseftirlitinu í átökum Ísraels og Araba (UNTSO) og til hægri er B. Gunnarsson, en fornafn hans höfum við ekki.
Í myndasafninu er mynd af sundlaug í Reykjavík 1962 og minnt á að hún hafi verið hluti af verkefni sem fjármagnað var með láni frá Alþjóðabankanum.
Haustið 1965 er Hannes Kjartansson orðinn fastafulltrúi og honum til fulltingis á allsherjarþinginu voru, honum á vinstri hönd Kristján Albertsson og Steindór Steindórsson og í aftari röð Niels P.Sigurðsson, Gunnar Gíslason og Halla Bergs.
Örn Erlingsson kenndi Kóreubúum fiskveiðar á vegum UNDP, Þróunarstofnunar SÞ og FAO, Matvæla- og landbúnaðarstofnunarinnar og er myndin tekin 1971.
Haraldur Kröyer, heldur blaðamannfund í höfuðstöðvum SÞ 1973 og með honum eru Gunnar G. Schram og Ívar
Guðmundsson. Kannski hefur landhelgismálið borið á góma?
Svo mikið er víst að það var efni blaðamannafundar Ingva S. Ingvasonar um „brot Breta á fullveldi Íslands“ í desember 1975.
1989 er Benedikt Gröndal, fyrrverandi forsætis- og utanríkisráðherra orðinn fastafulltrúi og hann afhenti Perez De Cuellar, trúnaðarbréf.
1992 kom það í hlut Eiðs Guðnasonar að undirrita Loftslagssáttmála Sameinuðu þjóðanna fyrir Íslands hönd.
Sama ár var kátt á hjalla þegar Jón Baldvin Hannibalsson sótti allsherjarþingið sem utanríkisráðherra og honum til fulltingis í fundarsalnum voru Hans G. Andersen, Helgi Gíslason, Ástríður Andersen, Bryndís Schram og Helga Jónsdóttir.
Vigdís Finnbogadóttir forseti Íslands ávarpaði Kvennaþing Sameinuðu þjóðanna í Beijing árið 1995
Kofi Annan, aðalframkvæmdastjóri Sameinuðu þjóðanna heimsótti Ísland 1997.
2013 kom svo arftaki hans Ban Ki-moon í opinbera heimsókn til Íslands.
