Nærri tvö hundruð þúsund manns hafa orðið að flýja heimili sín á svokallaðri „bláu línu” á milli suðurhluta Líbanon og norðurhluta Ísraels frá því átök blossuðu upp á Gasasvæðinu í október á síðasta ári.
Brýn nauðsyn er á að minnka spennu á landamærunum á milli ríkjanna, segir Imran Riza samræmandi mannúðarmála hjá Sameinuðu þjóðunum í Líbanon.
„Við ítrekum að nauðsynlegt er að gera meira til að binda enda á átökin og finna diplómatíska og pólitíska lausn. Halda ber áfram að vernda óbreytta borgara og mannúðarstarfsmenn,“ sagði Riza.
Daglegar árásir
Hundrað og fimmtíu þúsund manns til viðbótar búa innan við tíu kílómetra frá þeim svæðum sem friðargæslusveit Sameinuðu þjóðanna (UNIFIL) hefur eftirlit með. Gerðar eru stórskotaliðs- og loftárásir á þessum slóðum nærri daglega.
Hundrað og þrjátíu óbreyttir borgarar, þar af tuttugu og einn sjúkraflutningamaður og að minnsta kosti þrír blaðamenn, hafa dáið. Hezbollah-samtökin hafa ráðist á Ísrael með flugskeytum. Ísrael hefur ráðist á stöðvar Hezbollah í Líbanon og drápu einn leiðtoga samtakanna í Beirút.
Eyðileggingin eftir sprenginguna
Íbúar óttast stigmögnun átaka á sama tíma og sárin eftir sprenginguna miklu í Beirút-höfn eru ekki gróin. Hundruð tonna af ammoníumnítrati sprungu á lager í höfninni 4.ágúst 2020, eða fyrir fjórum árum. Mikil eyðilegging varð í stórum hluta Beirút, 218 létust og rúmlega sex þúsund særðust. Eyðileggingin er metin á milljarða Bandaríkjadala.
Á annan tug pólitískra leiðtoga og yfirmanna í öryggismálum og í höfninni hafa verið ákærðir en enginn hlotið dóm fyrir að bera ábyrgð.
Erfið staða
Riza minti á að Líbanon hafi verið á niðurleið fyrir stríðið á Gasa, og glímt við þráláta pólitíska, fjárhags-, efnahags- og félagslega kreppu.
„Nú árið 2024 þarfnast 3.7 milljónir manna á aðstoð að halda. Líbanir en einnig sýrlenskir og palestínskir flóttamenn og annað farandfólk.Átök hafa enn grafið undan möguleikum ríkisins á að takst á við áskoranir á sviði stjórnmála-, efnahags- og öryggismála,” sagði hann.
Fjárþörf
Embættismaðurinn lagði einnig áherslu á að þrátt fyrir fjárskort hefðu Sameinuðu þjóðirnar og samstarfsaðilar þeirra náð að koma einni milljón manna til hjálpar það sem af er árinu. Þar á meðal eru 180 þúsund manns sem líða fyrir átökin í Suður-Líbanon.
Hins vegar hefur aðeins tekist að afla um fjórðung þess fjár sem þarf til að veita þá hjálp sem nauðsynleg er.