Afganistan. Jarðskjálfti. Sameinuðu þjóðirnar hafa heitið því að „láta einskis ófreistað” til að nauðstöddum verði komið til bjargar eftir að harður jarðskjálfti reið yfir austurhluta Afganistans aðfararnótt 1.september.
Jarðskjálftinn mældist um 6 á Richter-kvarða. Hundruð hafa látist og heilu þorpin hafa verið þurrkuð út. António Guterres aðalframkvæmdastjóri Sameinuðu þjóðanna lýsti yfir samstöðu með Afgönum. „Liðsveitir Sameinuðu þjóðanna í Afganistan hafa verið virkjaðar og við munum láta einskis ófreistað til að nauðstöddum verði komið til aðstoðar á jarðskjálftasvæðunum,“ sagði hann í yfirlýsingu.
Starfsfólk ýmissa stofnana Sameinuðu þjóðanna á vettvangi hefur skýrt frá mikilli eyðileggingu í fjórum austur-héruðum landsins þar á meðal í Nangarhar og Kunar. Starfsfólk Sameinuðu þjóðanna tekur nú þegar þátt í hjálparstarfi ásamt samstarfsaðilum sínum í mannúðarmálum.
Jarðskjálftinn reið yfir um miðnætti að staðartíma og því er ástæða til að óttast að margir hafi verið inni við og hafi lokast inni í rústum heimila sinna.
Skjálftamiðjan var á átta kílómetra dýpi. Hús skulfu bæði í Kabúl höfuðborg Afganistans og Islamabad höfuðborg Pakistans.
Lyf og hjálpargögn flutt til jarðskjálftasvæða
Á meðal þeirra stofnana Sameinuðu þjóðanna, sem leggja hönd á plóginn í hjálparstarfi, eru UNAMA, sveit samtakanna í Afganistan, Samræmingarskrifstofa mannúðarmála (OCHA), Alþjóða heilbrigðismálastofnunin (WHO) og fleiri.
„Liðsmenn okkar eru á vettvangi á sjúkrahúsum og heilsugæslustöðvum og meta nú heilbirgðisþarfir á staðnum,” sagði Alþjóða heilbrigðismálastofnunin í yfirlýsingu.
„Við höfum þegar hafist handa við að koma nauðsynlegum lyfjum og hjálpargögnum til jarðskjálftasvæðanna.”
Sjá nánar um Afganistan hér.