Tíunda árið í röð er Lýðstjórnarlýðveldið Kongó á árlegum lista Norska flóttamannaráðsins (NRC) yfir vanræktasta flóttamannavandann og vanrækslan eykst stöðugt.
„Þetta er vitnisburður um að heiminum hefur mistekist að bregðast við neyðarástandi sem ekki er talið hafa hernaðarlega þýðingu fyrir rík lönd,“ sagði Jan Egeland, framkvæmdastjóri NRC. „Milljónir manna eru yfirgefnar vegna þess að við höfum kosið að aðhafast ekki, ekki vegna þess að við getum það ekki. Hinn óþægilegi sannleikur er sá að þessi vanræksla er val og eitthvað sem við getum kosið að binda enda á.“
Árið 2025 var aðeins 27,4 prósent af því fjármagni sem þurfti til að bregðast við neyðarástandinu í Lýðstjórnarlýðveldinu Kongó veitt, sem er lægsta hlutfall í 10 ár. Það þýðir að yfir 21 milljón manns í neyð fær enga eða verulega skerta aðstoð. Fyrir áratug síðan veitti alþjóðasamfélagið 55 Bandaríkjadali á hvern einstakling í neyð í Lýðstjórnarlýðveldinu Kongó. Í dag hefur sú tala hrunið niður í innan við 33 Bandaríkjadali.
Mynd: © WFP/Danijela Milic
Lítið breyttur listi
Lönd eins og Búrkína Fasó, Kamerún, Mið-Afríkulýðveldið, Malí og Nígería hafa öll verið á listanum sex sinnum eða oftar, sem bendir á kerfisbundið mynstur vísvitandi vanrækslu frekar en einangraðan misbrest.
„Gjafaríkjum hafa verið kynntar sannanir um vanrækslu, ár eftir ár. Samt sem áður kjósa valdhafar enn að forgangsraða hernaðarlegum og stefnumarkandi fjárfestingum og vanfjármagna, forgangsraða ekki og jaðarsetja fórnarlömb þessa neyðarástands. Þetta er brestur á mannúð okkar,“ sagði Egeland.
Skýrslan er tíunda útgáfa skýrslu NRC um vanræktan flóttamannavanda, þar sem fylgst er með því hvernig viðbrögð eru áfram langt frá því að mæta umfangi þjáninganna.
Súdan efst á lista
Tíu vanræktustu neyðarástandin fyrir árið 2025 eru Súdan, Lýðstjórnarlýðveldið Kongó, Kólumbía, Jemen, Afganistan, Hondúras, Ekvador, Kamerún, Nígería og Mósambík, sem spanna þrjár heimsálfur og tugi milljóna manna sem heimurinn heldur áfram að hunsa.
Í skýrslunni um vanræktan flóttamannavanda er metið hvert neyðarástand út frá fjórum vísum: fjölmiðlaumfjöllun, fjármögnun, pólitískri athygli og umfangi flóttafólks. Lægri einkunn gefur til kynna stærra bil milli umfangs mannlegra þjáninga og fullnægjandi alþjóðlegra viðbragða.
Súdan er efst á lista þessa árs. Meira en 9 milljónir manna eru á flótta innanlands og allt að 4 milljónir hafa flúið til nágrannalanda. Næstum 19,5 milljónir manna í Súdan búa við hungur, en alþjóðleg viðbrögð eru samt engan veginn fullnægjandi miðað við umfang þjáninganna.
Skýrslan er aðgengileg hér.