Evrópusambandið. Sameinuðu þjóðirnar. António Guterres aðalframkvæmdastjóri Sameinuðu þjóðanna sat í dag fund leiðtoga 27 aðildarríkja Evrópusambandsins í Brussel.
„Þessi heimsókn er dæmi um framúrskarandi samstarf Evrópusambandsins og Sameinuðu þjóðanna á mikilvægu augnabliki,” sagði Guterres á fundi með blaðamönnum fyrir fund með ráðherraráði ESB.
Á fundinum voru loftslagsbreytingar, stríðið í Úkraínu og Heimsmarkmiðin til umfjöllunar.
Heimsmarkmiðin
„Heimsmarkmiðin um sjálfbæra þróun þokast aftur á bak. Hungur og fátækt aukast, menntun og heilsugæslu hrakar í mörgum heimshlutum. Og það er ljóst að alþjóðlegt fjármálakerfi okkar er ekki hannað til að takast á við svo stóra áskorun,” sagði Guterres.
Hann bætti við að „það er að mörgu leyti á valdi Evrópusambandsins að taka forystu um þá umbreytingu sem er nauðsynleg til þess að Áætlun 20230 nái sér á skrið.”
Loftslagsbreytingar
Guterres gerði einnig síðustu skýrslu Loftslagsnefndar Sameinuðu þjóðanna (IPCC), og þá dramatíska lýsingu sem þar er að finna, að umtalsefni. „Við erum nærri vatnaskilum og ef við náum ekki áttum verður ómögulegt að takmarka hlýnun jarðar við 1.5 gráðu. Við þurfum að hraða aðgerðum og enn einu sinni treystum við að forystu ESB.”
Úkraína
Loks var innrás Rússa í Úkraínu á dagskránni. Hún hefur að sögn Guterres „valdið mikilli þjáningu hjá úkraínsku þjóðinni. Hún hefur einnig haft mikil áhrif í öllu heiminum og við munum nota tækifærið og skiptast á skoðunum um hvernig takast ber á við þessar áskoranir,” sagði aðalframkvæmdastjórinn.
