Sænsk yfirvöld hafa tilkynnt að mpx veirusýking hafi greinst í Svíþjóð. Þetta er í fyrsta skipti sem mpx veirusýking, sem áður var kennd við apabólu, greinist utan Afríku. Skammt er stórra högga á milli því í dag var tilkennt um nýtt tilfelli í Pakistan.
Um svokallað Clade 1 afbrigði er að ræða. Hingað til hafa rúmlega tvö þúsund dæmi um mpx veirusýkingu verið staðfest á rannsóknastofum á þessu ári, einkum í Lýðveldinu Kongó og ellefu öðrum ríkjum. Þrettán hafa látist.
Alþjóða heilbrigðismálstofnunin (WHO) hafði lýst yfir að þessi veirusýking sé nú alþjóðleg heilbrigðisvá áðu en tilfellið greindist í Svíþjóð. Veiran herjaði fyrst á Kongó en hefur síðan breiðst þaðan út til nágrannaríkja og nú út fyrir Afríku, í Svíþjóð og Pakistan.
„Við vinnum hörðum höndum í framlínunni í baráttu við veiruna í nánu samráði við innlend yfirvöld og samfélög,“ segir dr. Matshidiso Moeti Afríkustjóri WHO.
Nærri tvöfalt fleiri tilfelli í ár
Mpx -áður- apabóla er sjaldgæfur smitsjúkdómur sem hingað til hefur einungis verið landlægur í nokkrum löndum mið- og vesturhluta Afríku, segir á Vísindavef Háskóla Íslands. Hér er á ferðinni svokölluð súna (e. zoonosis), en það þýðir að sjúkdómurinn berst fyrst og fremst frá dýrum (aðallega nagdýrum) til manna; hins vegar er smit milli manna mögulegt.
Fyrsta tilfellið sem greindist var árið 1970. Á síðasta ári voru 1145 staðfest dæmi um mpx veirusýkingu en það sem af er árinu hafa greinst 2100 eins og fyrr segir.
Einkenni
Útbrot eru langsamlega algengasta birtingarform apabólu og koma fram í 95-100% tilfella. Útbrotin byrja sem rauðleitir, flatir blettir á húð sem þróast síðan á eftirfarandi máta: upphleyptir blettir, blöðrur með tærum vökva, blöðrur með greftri, opin sár, sár með skán sem síðan fellur af, heilbrigð húð grær yfir. Útbrotin byrja gjarnan (en ekki alltaf) á andliti og dreifast þaðan yfir á líkama og útlimi.. Útbrot geta einnig myndast á slímhúðum, til dæmis í munni, endaþarmi og á kynfærum., segir á Vísindavef Háskóla Íslands.
Sjá nánar hér.