Úkraína. Mannúðaraðstoð. Sameinuðu þjóðirnar hafa farið fram á 2.3 milljarða Bandaríkjadala fjárveitingar til að standa straum af kostnaði við mannúðaraðstoð í Úkraínu á þessu ári. Markmiðið er að koma 4.1 milljón manna í landinu til hjálpar. Beiðnin er lögð fram á sama tíma og Rússar hafa gert harðar árásir á landið.
Frá því Rússland gerði allsherjarinnrás í nágrannaríki sitt í febrúar 2022, hafa Sameinuðu þjóðirnar komið bágstöddu fólki til hjálpar í landinu. Borgarbúum sem sæta dróna- og flugskeytaárásum hefur verið komið til hjálpar. Einnig samfélögum nærri víglínunni og fólki, sem flúið hefur hættuna.
2025 mannskætt ár
„Við erum að tala um fólk sem flosnað hefur upp frá heimilum sínum og dvalið í almannarýmum í tvö til þrjú ár. Við erum að tala um eldra fólk og fólk með skerta hreyfigetu,“ sagði Matthias Schmale yfirmaður aðstoðar Sameinuðu þjóðanna í Úkraínu.
Rússar hafa gert nærri 1100 drónaárásir, kastað meir en 890 stýrðum sprengjum og skotið að minnsta kosti 50 flugskeytum af ýmsum toga á Úkraínu í liðinni viku að sögn fjölmiðla og stjórnvalda.
Mannréttindateymi Sameinuðu þjóðanna í Úkraínu telur að 2025 hafi verið mannskæðasta árið frá 2022. 2500 óbreyttir borgarar voru drepnir og rúmlega 12 þúsund særðir.
-15°C í Kyiv
Sameinuðu þjóðirnar hafa séð nauðstöddum fyrir grundvallaraðstoð; svo sem mat, heilsugæslu, húsaskjóli, vernd og reiðufé. Féð sem safnað verður, mun einnig standa straum af kostnaði við flutninga fólks sem er í bráðri hættu frá víglínunni. „Hetjur sinna þessu starfi við víglínuna,” sagði Schmale um þau hundruð mann sem bjarga mannslífum á þennan hátt með stuðningi Sameinuðu þjóðanna.
„Við viljum halda áfram stuðningi okkar, eins og við getum, en til þess þurfum við fjármagn,“ sagði Schmale. Hann benti sérstaklega á þær miklu þjáningar sem óbreyttir borgarar liðu, nú þegar15 stiga frost er í Kyiv.