11. október 2012. Þriðja hver kona í heiminum giftist fyrir átján ára aldur. Þriðja hver í þessum hópi giftist svo innan fimmtán ára aldurs.
Athyglinni er beint að barnagiftingum Alþjóðadegi stúlkubarna sem haldinn er í fyrsta skipti 11. október 2012.
Barnagiftingar eru brot á grundvallar mannréttindum og hefur áhrif á allt líf stúlkunnar sem í hlut á. Með því að giftast á barnsaldri er stúlkan svipt æskunni, námi hennar er stefnt í uppnám, tækifæri hennar minnka og líkurnar aukast á því að hún verði ofbeldi og misnotkun að bráð. Með þessu er heilsu hennar stefnt í voða. Segja má að barnabrúðkaup séu þrándur í götu nær allra Þúsaldarmarkmiðanna um þróun og þróun í átt til heilbrigðra samfélaga.
“Barnagiftingar svipta stúlkur tækifærum og leiða til óæskilegra þungana of ungra stúlkna sem oft stefnir lífi þeirra í hættu,” segir Ban Ki-moon, framkvæmdastjóri Sameinuðu þjóðanna í yfirlýsingu í tilefni dagsins. “Ef móðir er yngri en átján ára, eru líkurnar á því að barnið deyi á fyrsta ári 60 prósent meiri en barn sem fætt er af móður sem er átján ára eða eldri.”
Helsta dánarorsök stúlkna á aldrinum 15 til 19 ára þróunarlöndum tengist þungunum.
Meiri líkur eru á því að stúlkur sem notið hafa lítillar menntunar giftist snemma og oftast nær er endir bundinn á skólagöngu stúlkna þegar þær giftast á barnsaldri. Á hinn bóginn er sex sinnum ólíklegra að stúlkur sem notið hafa framhaldsmenntunar giftist á barnsaldri og því er aukin menntun ein besta leðin til að vernda stúlkur og berjast gegn barnagiftingum.
