Mannnúðaraðstoð. USAID
Stofnanir Sameinuðu þjóðanna segja að niðurskurður framlaga Bandaríkjanna til mannúðaraðstoðar í heiminum muni hafa alvarlegar afleiðingar. Þær skora á hina nýju Bandaríkjastjórn að hvika ekki frá forystuhlutverki landsins í mannúðaraðstoð í heiminum.
Að sögn Samræningarskrifstofu mannúðaraðstoðar hjá Sameinuðu þjóðunum (OCHA) stendur Bandaríkjastjórn straum af 47% þess sem safnast þegar farið er fram á framlög til mannúðaraðstoðar.
Ný Bandaríkjastjórn hefur nú sett bandarísku þróunarsamvinnustofnunina USAID undir beina stjórn utanríkisráðherrans. Starfsfólk hefur verið sent heim og nýstofnuð skilvirknideild stjórnarinnar sakar USAID um glæpastarfsemi og skort á reikningsskilum.
„Opinberar ávirðingar bjarga engum mannslífum,” sagði Jens Lærke talsmaður OCHA.
Nærri öll aðstoð stöðvuð
Nærri öll aðstoð Bandaríkjanna við erlend ríki og stofnanir hefur verið stöðvuð á meðan þriggja mánaða yfirferð stendur yfir. Að auki tilkynnti Bandaríkjastjórn úrsögn Bandaríkjanna úr UNRWA, Palestínu-flóttamannahjálpinni og Mannréttindaráðinu, þó svo Bandaríkin eigi raunar ekki sæti í ráðinu. Aðild að UNESCO og framlög er stöðvuð á meðan úttekt stendur yfir. Áður hafði Trump forseti tilkynnt um úrsögn úr WHO, Alþjóða heilbrigðismálastofnuninni og Parísar-samningum um viðnám við loftslagsbreytingum.
Sameinuðu þjóðirnar standi vaktina
António Guterres aðalframkvæmdastjóri Sameinuðu þjóðanna skrifaði starfsmönnum bréf þar sem hann skorar á þá að tryggja að „þýðingarmikið þróunar- og mannúðarstarf haldi áfram,” þrátt fyrir ákvarðanir Trumps.
Guterres sagði að samtökin myndu meta og milda áhrif ákvarðananna.
„Starf Sameinuðu þjóðanna er mikilvægara en nokkru sinni fyrr….Við munum í sameiningu tryggja að samtök okkar haldi hiklaust áfram að þjóna bágstöddu fólki um allan heim.”