Matvælaáætlun Sameinuðu þjóðanna (WFP) hefur tilkynnt að tekist hafi að brúa bilið í fjármálum hennar sem myndast hafði vegna gríðarlegrar hækkunar matvælaverðs í heiminum.
Sveltandi fólki í heiminum hefur fjölgað um 130 milljónir vegna svokallaðrar "matvælakreppu".
WFP hafði beðið þjóðir heims um að veita áætluninni 755 milljón dollara til viðbótar til þess að hægt yrði að brauðfæða sveltandi fólk í heiminum en ella hefði orðið að skera niður matarskamma til að stemma stigu við verðhækkunum.
Sádi Arabar hlupu undir bagga með 500 milljón dollara framlag og þar með hafði tekist að brúa bilið.
“Við báðum heiminn um að hjálpa hinum hungruðu og ríki heims hafa verið rausnarleg,” segir Josette Sheeran, forstjóri WFP. “Þetta dæmir sýnir hvað mannvinir um allan heim geta gert þegar þeir leggjast á eitt um að finna lausn á vanda sem snertir okkur öll.”
WFP hafði farið fram á 755 dollara aukaframlag til að stemma stigu við hækkunum matar- og orkuverðs. Þrjátiu og eitt ríki hafði svarað beiðni WFP og lofað að leggja fram samtals 460 milljón dollara þegar Sádi Arabar bættu um betur. Rausnarlegt framlag þeirra þýðir að WFP hefur 214 milljónir dollara aflögu til að berjast gegn hungri.
Þegar hálft árið er liðið hefur WFP 4.5 milljarða dollara til að fæða milljónir sveltandi manna. Þar af hafa tveir milljarðar þegar verið greiddir í sjóði WFP en afgangurinn eru loforð um fjárframlög.
“Framlag Sádi Araba mun bjarga mörgum mannslífum og bjarga mörgum frá vannæringu og sjúkdómum og jafnvel koma í veg fyrir upphlaup og óeirðir,” segir Sheeran.
WFP telur að mikil hækkun matarverðs sé mesta áskorun sem áætlunin hefur glímt við í 45 ára sögu sinni. Talið er að fjöldi sveltandi manna í heiminum hafi fjölgað um hundrað og þrjátíu milljónir vegna þessa.
