Gasasvæðið. António Guterrres aðalframkvæmdastjóri Sameinuðu þjóðanna skýrði frá því í dag að farið yrði fram á fjárframlög að upphæð 1.2 milljarða Bandaríkjadala til stuðnings íbúm Gasa og herteknu svæðunum í kjölfar yfirstandandi átaka.
Heilbrigðisráðuneytið á Gasa, sem er undir stjórn Hamas, sagði í dag að nú hefðu 10 þúsund látist í árásum Ísraels. Guterres sagði á blaðamannafundi í New York að þeirra á meðal væru 89 starfsmenn UNRWA, Palestínu-flóttamannahjálparinnar.
„Gasa er að breytast í barna-grafreit,“ sagði Guterres. „Fréttir berast af því að hundruð stúlkna og drengja séu drepin eða særist á hverjum degi. Fleiri blaðamenn hafi verið drepnir á þessu fjögurra vikna tímabili en í nokkrum öðrum átökum í að minnsta kosti þrjá áratugi. Fleiri hjálparstarfsmenn Sameinuðu þjóðanna hafa verið drepnir á jafn löngum tíma, en nokkru sinn fyrr í sögu samtakanna.“
Fordæmir gíslatökur
Guterres gagnrýndi harðlega gíslatöku Hamas og lýsti samúð með gíslunum og fjölskyldum þeirra. „Ég ítreka fordæmingu mína á hræðilegum hryðjuverkum Hamas 7.október og endurtek kröfu mína um tafarlausa, skilyrðislausa og örugga lausn gíslanna.“
Hann gagnrýndi hversu lítil aðstoð bærist til nauðstaddra og sagði engan veginn nóg að opna landamærin á Rafah stöðinni á mörkum Egyptalands og Gasa. Á síðustu tveimur vikum hefðu fjögur hundruð vörubílum með neyðaraðstoð verið hleypt inn til Gasa, en venjulega kæmu þangað fimm hundruð bílar á dag. Ekki nóg með að vatn og matvæli væru á þrotum, heldur væri ekki leyft að flytja eldsneyti. Sjúkrahús væru að verða óstarfhæf og nýfædd börn í súrefniskössum og sjúklingar í öndunarvélum væru í lífshættu.
Vopnahlé nú þegar
Hann sagði algjörlega ljóst hvað þyrfti:
„Mannúðarvopnehlé. Núna.
Stríðandi fylkingar virði skuldbindingar sínar samkvæmt alþjóðalögum. Núna.
Öllu gíslum verði sleppt skilyrðislaust. Núna.
Óbreyttir borgarar, sjúkarhús, starfsstöðvar SÞ, skýli og skólar njóti verndar. Núna.
Flutningar á meiri matvælum, meira vatni, meiri lyfjum og auðvitað eldsneyti verði leyfðir, eins mikið og þörf krefur. Núna.“
