1.september 2015. Talið er að fimm milljónir Úkraínumanna eigi með einum eða öðrum hætti um sárt að binda vegna átakanna í landinu. Þetta er álíka og allur íbúafjöldi Finnlands eða Danmerkur.
OCHA, Mannúðarskrifstofa Sameinuðu þjóðanna varar við því að mjög erfitt geti reynst að koma vistum til þeirra sem höllustum fæti standa í Úkraínu í vetur.
Talið er að 2 milljónir manna búi á svæðum nærri víglínunni á milli stjórnarhersins og uppreisnarmanna. Mest kreppir að þessu fólki og er það efst á forgangslista hjálparstofnana að ná til þeirra. Að sögn OCHA er við vandamál að glíma vegna öryggis en einnig þvælist skrifræði fyrir, lagaflækjur og erfiðar samgöngur.
„Helmingur fólksins býr á yfirráðasvæði stjórnarhersins en aðrir á svæðum uppreisnarmanna. Margir óbreyttir borgarar eru í stöðugri lífshættu vegna vopnaviðskipta.“
Félagsleg þjónusta er af skornum skammti, verslun hefur snarminnkað, fólk hefur ekki aðgang að bótum og lífeyri, auk þess sem bankakerfi er óstarfhæft á yfirráðasvæði uppreisnarmanna.
Meir en 2 milljónir manna hafa fengið litla sem enga aðstoð frá mannúðarstofnunum, vegna öryggisleysis og skrifræðis.
Hjálparsamtök benda á að vetur sé í aðsigi og brýnt að grípa til aðgerða áður veður hamlar sendingu hjálpargagna.
