COP28. Loftslagsráðstefna Sameinuðu þjóðanna. Loftslagsbreytingar. António Guterres aðalframkvæmdastjóri Sameinuðu þjóðanna sagði á COP28 að þrátt fyrir framfarir hafi olíu- og gasiðnaðurinn ekki gengið nægilega langt í skuldbindingum sínum.
Guterres var með orðum sínum að bregðast við yfirlýsingu nokkurra stórra olíu- og gasframleiðenda um að draga úr metanleka fyrir 2030. Guterres sagði þetta góðra gjalda vert en hins vegar væri litið framhjá kjarna málsins: að stöðva losun frá brennslu jarðefnaeldsneytis.
„Sumpart er það jákvætt að jarðefnaeldsneytisiðnaðurinn – risinn að baki loftslagsvárinnar – sé að ranka við sér,“ sagði Guterres.
Vísindin eru afdráttarlaus
„Skuldbinding um að stöðva metanleka fyrir 2030 er spor í rétta átt. En í tilkynningunni um að ná nettó-núll losunarmarki fyrir 2050 segir ekkert um að uppræta losun af völdum notkunar jarðefnaeldsneytis… Niðurstöður vísindanna eru þó afdráttarlausar: við verðum að binda smám saman enda á notkun jarðefnaeldsneytis í samræmi við það mark að halda hlýnun jarðar innan 1.5 gráðu á Celsius.“
Guterres gagnrýndi einnig þá staðreynd að ekki væri neinn skýran vegvísi að finna um hvernig ætti að ná netto-núll losun fyrir 2050.
„Það er ekkert pláss fyrir grænþvott. Og það á líka við yfirlýsinguna frá í gær.“
250 þúsund dauðsföll
Heilbrigðismál voru á dagskrá í fyrsta skipti í loftslagsumræðum á vettvangi Sameinuðu þjóðanna sunnduaginn 3.desember. Alþjóða heilbrigðismálastofnunin (WHO) telur að ef einungis sé litið á fáar heilsuvísitölur þá valdi loftslagsbreytingar 250 þúsund viðbótar dauðsföllum á ári á næstu áratugum.
Dr. Tedros Adhanom Ghebreyesus forstjóri WHO sagði á COP28 að það væri löngu tímabært að ræða áhrif loftslagsbreytinga á borð á heilbrigði jarðarbúa.
„Loftslagskreppan er heilbrigðiskreppa en 27 Loftslagsráðstefnunar hafa verið haldnar án þess að ræða það. Það er ekki lengur í boði,“ sagði dr. Tedros.
Hann ítrekaði að WHO fagnaði yfirlýsingunni sem samþykkt var á laugardag á Leiðtogafundinum um loftslagsaðgerðir.
