Alþjóðlegi krabbameinsdagurinn. Krabbamein. Tíu milljónir manna í heiminum deyja úr krabbameini á hverju ári. Það eru fleiri andlát en af völdum HIV/alnæmis, mýrarköldu og berkla samanlagt.
Sérfræðingar spá því að talan hækki í þrettán milljónir fyrir 2030. Alþjóða krabbameinsdagurinn er haldinn 4.febrúar ár hvert
Fimmti hver jarðarbúa fær krabbamein einhvern tíma á lífsleiðinni. Forvarnir gegn þessum vágesti eru ein af mestu lýðheilsuáskorunum tuttugustu og fyrstu aldarinnar.
Hægt er að koma í veg fyrir þriðjung krabbameinstilfella. Og lækna má annan þriðjung ef hann er greindur nægilega snemma og réttri umönnun er beitt.
Framfarir
Þekking á krabbameini hefur aldrei verið eins mikil og nú. Þökk sé fjárfestingum í rannsóknum og nýsköpun hafa orðið einstakar framfarir innan læknisfræðinnar, í greiningu og vísindalegri þekkingu.
Aukin þekking greiðir fyrir framförum í að draga úr áhættuþáttum, bæta forvarnir og greiningu, meðferð og hjúkrun.
Áhrif
Í dag verða tveir þriðju hlutar dauðsfalla af völdum krabbameins í minnst þróuðu ríkjum heims. En jafnvel í ríkjum þar sem tekjur eru hærri, ríkir ójöfnuður. Fleiri dauðsföll verða á meðal hinna tekjulægri, frumbyggja, innflytjenda, flóttamanna og landsbyggðarbúa.
Með því að auka skilning almennings og stjórnmálamanna á krabbameini, má bæta skilning, kveða í kútinn bábiljur og misskilning og breyta hegðun og viðhorfum. Regluleg markviss hreyfing er nauðsynleg til að viðhalda heilbrigðum líkama og eðlilegum efnaskiptum, sjá nánar hér.
Krabbamein á Íslandi
Rúmlega helmingur þeirra sem greinast með krabbamein á Íslandi eru 65 ára eða eldri. Um það bil þriðji hver Íslendingur fær krabbamein einhvern tíma á ævinni. 28% dauðsfalla á Íslandi má rekja til krabbameins.
Búist er við að tíðni krabbameins á Íslandi aukist um 52% frá 2020 til 2050.
(Heimild: Krabbameinsfélag Íslands).
