Sameinuðu þjóðirnar hafa sent út neyðarkall í aðdraganda alþjóðlegrar ráðstefnu um vanda Sýrlands og nágrannaríkja þess. Hún verður haldin í Brussel 30.júní.
Neyðarkallið er sent út nú þegar afleiðingar COVID-19 eru farnar að skaða efnahag heimshlutans af fullum þunga. Ástæða er til að óttast að enn sé grafið undan stöðugleika.
Búist er við að ríkisstjórnir og aðrir veitendur aðstoðar skuldbyndi sig til að láti 3.8 milljarðar Bandaríkjadala af hendi rakna til Sameinuðu þjóðanna og samstarfsaðila þeirra til verkefni í Sýrlandi. Einnig rúmlega 6 milljarða til flóttamanna og til stuðnings nágrannaríkjum Sýrlands.
Tekist hefur að mæta áætlunum um brýnustu þarfir annars vegar um 30% og hins vegar um aðeins 19%.
„Átökin í Sýrlandi hafa nú staðið yfir næstum því jafn lengi og fyrri og síðari heimsstyrjaldirnar samanlagt,” bendir Mark Lowcock framkvæmdastjóri mannúðarmála (OCHA) hjá Sameinuðu þjóðunum. „Heil kynslóð barna þekkir ekkert annað en vosbúð, eyðileggingu og skort.”
Meir en 11 miljónir manna þurfa á aðstoð og vernd að halda innan landamæra Sýrlands. Helmingur íbúafjöldans fyrir stríð, 13.2 milljónir hafa flúið heimili sín og eru ýmist innan landamæra Sýrlands eða hafa flúið land.
Þetta er mesti flóttamannavandi heims en 6.6 milljónir Sýrlendinga hafa flúið land, langflestir eða 5.5 milljónir til nágrannalandanna Tyrklands, Líbanon, Jórdaníu, Íraks og Egyptalands.
Ríkisstjórnir þessara ríkja hafa nú hýst milljónir berskjaldaðs fólks í nærri áratug og eiga sífellt erfiðara með að tryggja þeim þjónustu.
Ástandið hefur versnað enn undanfarna mánuði nú þegar ríkin glíma við alvarlegar félagslegar- og efnahagslegar afleiðingar COVID-19. Nýjar tölfræðilegar upplýsingar benda til að niðursveifla sé í hagkerfum gistiríkja sýrlenskra flóttamanna og fátækt fari vaxandi.
Öflugrar viðleitni er þörf til að hjálpa þeim sem höllustum fæti standa og tryggja stöðugleika.
Flóttamenn líða fyrir COVID-19
Milljónir flóttamanna hafa misst lífsviðurværi sitt, safna skuldum og geta í sívaxandi mæli ekki mætt grundvallarþörfum sínum.
Barnaþrælkun, kynbundið ofbeldi, barnahjónabönd og ýmiss konar misnotkun færist í vöxt.
„COVID-19 kreppan hefur svipt milljónir sýrlenskra flóttamanna og gistiþjóða þeirra lífsviðurværi,” segir Filippo Grandi Flóttamannastjóri Sameinuðu þjóðanna. „Þeir sem minnst mega sín í samfélaginu – þar á meðal milljónir flóttamanna – hafa misst óvissar og lágar tekjur sínar.“
