Fjárfestingar í viðbrögðum við Alnæmi eru farnar að skila árangri nú þrjátíu arum eftir að faraldurinn reið yfir, að því er fram kemur í nýrri skýrslu sem Ban Ki-moon, framkvæmdastjóri Sameinuðu þjóðanna kynnti í dag.
Þar kemur fram að fjöldi nýrra smita fer lækkandi, aðgangur að meðferð er að aukast og tekist hefur að minnka HIV-smit frá mæðrum til barna í heiminum.
Frá 2001 til 2009, hefur tíðni HIV smits minnkað um að minnsta kosti 25% í 33 ríkjum, þar á meðal 22 í Afríku sunnan Sahara. Við árslok 2010 voru 6 millljónir manna í lyfjameðferð í lág- og meðaltekjulöndum. Og í fyrsta skipti árið 2009 náðu varnir til að hindra HIV frá móður til barns meir en 50%.
En þrátt fyrir þennan árangur upp á síðkastið, er lögð áhersla á það í skýrslunni að árangurinn er brothættur. Fyrir hvern einn sem hefur lyfjameðferð, sýkjast tveir af HIV. Á hverjum degi sýkjast 7 þúsund manns í heiminum, þar af þúsund born. Veikir innviðir ríkja, fjárhagsskortur og mismunun gegn ýmsum þeirra sem standa höllustum fæti eru á meðal hindrana gegn aðgangi að HIV vörnum, meðferð, umönnun og stuðningsjónustu.
Skýrsla framkvæmdastjórans byggir á tölfræði frá 182 löndum. Þar eru settar fram fimm lykil-ráðleggingar sem veraldarleiðtogar munu fara yfir á sérstökum fundi háttsettra leiðtoga á Allsherjarþingi Sameinuðu þjóðanna um Alnæmi 8. – 10. júní 2011.
“Veraldarleiðtogar hafa einstakt tækifæri á þessu mikilvæga augnabliki til að meta árangur og skilgreina hvar skóinn kreppir að í viðbrögðum við Alnæmi á heimsvísu,” sagði framkvæmdastjórinn á blaðamannafundi í Nairobi, höfuðborg Kenýa. “Við verðum að taka djarfar ákvarðanir til að umbylta alnæmisviðbrögðum og skjóta stoðum undir HIV-lausa kynslóð. “
Ráðleggingarnar í skýrslu framkvæmdastjórans eru fimm talsins:
Fylkja liði ungs fólks gegn HIV smiti.
Blása nýju lífi í átak í þágu almenns aðgangs að HIV vörnum, meðferð, umönnun og stuðningi fyrir 2015.
Starfa með einstökum ríkjum að því að gera HIV áætlanir ódýrari, skilvirkari og sjálfbærari.
Efla heilsu, mannréttindi og reisn kvenna og stúlkna.
Tryggja gagnkvæma ábyrgð til að breyta orðum í athafnir í viðbrögðum við Alnæmi.
