António Guterres aðalframkvæmdastjóri Sameinuðu þjóðanna sagði að ekki aðeins milliríkjasamskiptum heldur einnig „ávöxtum upplýsingastefnunnar” stæði nú ógn af „rökleysi, fáfræði og einangrunarstefnu,“ þegar hann tók við heiðursdoktorsnafnbót við KU Leuven og UC Louvain háskólana í Belgíu í dag fyrir hönd Sameinuðu þjóðanna.
„Ég er hér í dag til þess að flytja einfaldan en öflugan boðskap: milliríkjasamskipti skipta máli. En þau sæta fordæmalausum árásum Við getum og við verðum að sigrast á þessari ógn,“ sagði Guterres.
Upplýsingin í hættu
Guterres sagði að Leuven-borg hefði verið vettvangur þýðingarmikilla framfara frá tímum Endurreisnarinnar fram á upplýsingaöld; frá mannúðarstefnu Erasmusar og kortagerðar Mercators til núverandi rannsókna á gervigreind.
Hins vegar stæðum við nú frammi fyrir því að „missa sjónar á stærstu gjöf Evrópu til mannkynsins: upplýsingunni.“
„Hver sem litið er ógna raddir rökleysu, fáfræði og einangrunarstefnu ávöxtum upplýsingarinnar,“ sagði aðalframkvæmdastjórinn. „Sannleiki, vísindi og þekking sæta árásum. Tortryggni og alþjóðleg sundrung grafa undan þeim gildum sem Sameinuðu þjóðirnar standa fyrir: samvinnu, samstöðu, sameiginlegum aðgerðum og mannréttindum.“
Öflug, sameinuð Evrópa meginstoð SÞ
Guterres minnti á að nú þegar 600 ára afmælis háskólahalds í Leuven sé fagnað, sé 80 ára afmælis Sameinuðu þjoðanna minnst. Hann hrósaði Belgíu og Evrópusambandinu fyrir að halda uppi merki alþjóðlegrar samvinnu, lýðræðis, mannréttinda og samstöðu á heimsvísu.
„Ég er staddur hér í Evrópu og við vitum að þessi skuldbinding við milliríkjasamvinnu er hjartsláttur sambands ykkar,“ sagði Guterres. „Evrópuhugsjónin er mikilvæg áminning um sameiginlega ábyrgð okkar og skyldur við þá sem höllustum fæti standa í heiminum. Hún er sönnun þess að einangrunarstefna er aldrei lausn, heldur blekking. Og öflug og sameinuð Evrópu er ekki aðeins nauðsynleg fyrir þessa heimsálfu. Hún er ein meginstoða sterkra og skilvirkra Sameinaðra þjóða.“
Fólk mun þjást og deyja vegna niðurskurðar
Aðalframkvæmdastjórinn ræddi ýmis helstu mál á dagskrá alþjóðlegra stjórnmála. Hann sagði að „raddir þjóðernishyggju og einangrunarstefnu væru sífellt háværari og þeim fylgdi hætta á valdbeitingu í stjórnmálum. Á sama tíma og dregið væri úr fjárveitingum til mannúðarmála og þróunar, væru útgjöld til varnarmála aukin.
„Það væri grimmileg kaldhæðni ef hinum snauðuværi gert að greiða gjaldið fyrir vopn hinna ríku,“ sagði Guterres. Hann sagði að hann hefði heimsótt í síðustu viku flóttamannabúðir Rohingya-fólks í Cox´s Bazar í Bangladesh. „Nú þegar fjármögnunarkreppan magnast finnur fólkið í Cox´s Bazar fyrst fyrir afleiðingunum. Fjármagn til að útvega lífsnauðsynjar á borð við mat er á þrotum. Ef þessi niðurskurður í Cox´s Bazar og víðar verður ekki endurskoðaður mun fólk þjást og fólk mun deyja.“
Von felst í sögu Leuven
Guterres beindi orðum sínum til námsmanna við KU Leuven og UC Louvain háskólanna og sagðist sannfærður um að hægt sá að vinna bug á þeirri ógn sem nú steðjaði að milliríkjasamskiptum. Hann rifjaði upp að háskólabókasafnið í Leuven hefði verið lagt í auðn í í tvígang; í byrjun fyrri og síðari heimsstyrjaldar. Í endurreisn þess fælust skýr og öflug skilaboð.
„Það var ekki aðeins verið að ráðast á bækur og handrit. Þetta voru árásir á sögu, vísindi, skynsemi, þekkingu og list. Þetta voru árásir á aðalsmerki mannkynsins.”
Hann hvatti háskólastúdentana til að skipa sér „í fylkingarbrjóst fyrir mannlegri reisn.”
Hafnið skeytingarleysi
„Hafnið skeytingarleysi. Veljið von. Berjist gegn óréttæti. Verjið sannleikann. Dragið lærdóm af sögu háskólans ykkar,“ sagði Guterres. „Þetta snýst ekki bara um sögu Leuven. Þessi saga sýnir að hver sem ógnin er, getum við sigrast á henni. Við getum rutt hindrunum úr vegi. Við getum byggt betur en fyrr. Við skulum koma þessari arfleifð áfram. Og höldum áfram uppbyggingarstafi – saman.“