FN-sambandet birra dás.
Dál besset nuorat maiddái oassálastit globála áŋgiruššamii olahit guoddevašvuođa mihttomeriid – davvisámegillii! Bearjadaga golggotmánu 25. beaivvi almmuhuvvo ON guoddevašvuođa mihttomeriid davvisámegieljorgaleapmi.
ON guoddevašvuođa mihttomearit leat máilmmi vuosttaš oktasaš doaibmaplána dasa movt gieđahallat globála hástalusaid nu go jávkadit geafivuođa, eastadit erohusaid ja bissehit dálkkádatrievdamiid.
Guoddevašvuođa mihttomearit leat jorgaluvvon olu gielaide, maiddái dárogillii. Dássážii lea jorgaleapmi Norgga nuppi almmolaš gillii, sámegillii, váilon.
Dál lea FN-sambandet jorgalan guoddevašvuođa mihttomeriid davvisámegillii, ja Norgga UNESCO-kommišuvdna lea ruhtadan.
Oktasaš áŋgiruššan
Vaikko lea vuosttažettiin nationála eiseválddit ovddasvástádus olahit mihttomeriid 2030 rádjai, fertejit ealáhusat, báikkálaš eiseválddit, siviila servodat ja muđui olbmot maiddái oassálastit dán bargui.
Okta ON guoddevašvuođa mihttomeriid váldoprinsihpain lea ahte ii oktage galgga báhcit. Dan dihte galggašii ON guoddevašvuođa mihttomearit gávdnot buot gielaide, nu ahte juohkehaš beassá digaštallamis ja ovttasbarggus leat mielde vai nagodit čoavdit globála hástalusaid.
– Lea erenomáš dehálaš ahte mánát ja nuorat ohppet guoddevašvuođa mihttomeriide birra, vai besset leat mielde váikkuheames iežaset boahtteáiggi. Dál besset sámi nuorat maiddái digaštallat hástalusaid ja leat mielde gávdnat čovdosiid, davvisámegillii, dadjá FN-sambandet generálačálli Anne Cath da Silva.
ON eamiálbmotgielaid jahki
2019 lea ON riikkaidgaskasaš eamiálbmotgielaid jahki. Vaikko davvisámegiella lea ovdánan maŋemus jagiid, oaivvilduvvo goitge dávjá ahte sámegiella beaivválašgiellan lea manname maŋos guvlui. ON guoddevašvuođa mihttomeriid jorgaleapmi davvisámegillii lea mielde gáhtteme giela.
FN-sambandet áigu joatkit dán dehálaš barggu ja jorgalahttit oahpahusmateriála guoddevaš ovdáneami birra davvisámegillii. Guoddevaš ovdáneapmi lea okta dain vuoruhuvvon fágarasttildeaddji fáttáin ođđa oahppoplánain 2020 rájes.
Almmuheapmi
Bearjadaga golggotmánu 25. beaivvi dii. 11:30 Romssa ráđđeviesus.
Sártnit ja almmolaš almmuheapmi FN-sambandet, Romssa sátnejođiheaddji Gunnar Wilhelmsena ja sámediggeráđi Henrik Olsena bokte.
Mii guossohit gáhkuid ja gáfe. Emil Karlsen guoimmuha.
